Mas di 100.000 obheto di nos herencia cultural ta digitalmente accesibel pa mundo via coleccion.aw
Minister Maduro di Cultura ta informa:
Mas di 100.000 obheto di nos herencia cultural ta digitalmente accesibel pa mundo via coleccion.aw
Danki na e plataforma di colaboracion Coleccion Aruba y Internet Archive
E siman cu a pasa Aruba tabata anfitrion di e ‘Dutch Caribbean Digital Heritage Week’ den cual a focus riba e importancia di colaboracion den Reino Hulandes di instancianan cu ta contene informacion historico pa perseveracion di herencia cultural den forma digital. Aruba ta duna un gran ehempel cu e colaboracion di mas di 10 instancia na e Plataforma digital Coleccion Aruba cu a percura pa mas di 100.000 obheto di Aruba su herencia cultural den forma di documento y video por ta accesibel via e website Coleccion.aw.
Plataforma digital Coleccion Aruba
Coleccion Aruba ta nace fo’i e trabou pionero haci na Biblioteca Nacional Aruba na unda a bin ta digitalisa e coleccion di e biblioteca y poco poco a haci e informacion aki accesibel via nan website y tambe via Archive.org, cu ta un archivo digital cu ta brinda acceso universal na informacion. Den un colaboracion estrecho cu e prome partnernan, Archivo Nacional di Aruba, UNOCA, Museo Arqueologico Nacional Aruba, Stichting Monumentenfonds Aruba y Plantage Zorg en Hoop, y mas reciente cu Telearuba y Departamento di Cultura, Oficina di Monumento, Universidad di Aruba y UNESCO Aruba, Coleccion Aruba ta crece y bira e archivo digital mas grandi cu informacion di Aruba na Papiamento.
Internet Archive
E informacion riba coleccion.aw ta accesibel riba internet via Internet Archive atraves di archive.org cu ta un compania sin lucro di ganashi funda pa sr. Brewster Kayle cu e meta pa traha un biblioteca riba internet cu por ofrece acceso permanente na investigadonan, historiadonan y studiante cu informacion historico cu ta existi den e formato digital. Tabata durante pandemia cu un turista cu ta un trahado di Internet Archive a bishita Biblioteca Nacional y a sugeri pa haci e informacion digitaliza di e coleccion na biblioteca gratuitamente accesibel riba internet atraves di archive.org. Cu yudansa di Setar NV cu a haci donacion di e domain coleccion.aw, e cooperacion exitoso hunto cu Internet Archive a cuminsa y a desaroya pa awe nos por tin mas di 100.000 obheto di e herencia cultural di Aruba accesibel riba internet. Durante e prome dia di e simposio ‘Dutch Caribbean Digital Heritage Week ‘ sr. Kayle den nomber di Internet Archive a entrega na e miembronan di e Plataforma Coleccion Aruba dos ‘external harddrive’ cu ta contene e ‘backup’ di ful e contenido di coleccion.aw cu te awo ta 10 terabytes na informacion.
Coleccion.aw
E website coleccion.aw a keda lansa oficialmente aña pasa na september y recientemente esaki a keda actualisa pa asina por brinda e usuario un miho navegacion. Via coleccion.aw acceso ta wordo brinda ya caba na mas di 100.000 obheto di cual tin 40.000 documento, 60.000 imagen y 7 obheto den 3D. Coleccion.aw ta bira asina e archivo digital di mas grandi den nos idioma Papiamento y un ehempel bibo di colaboracion cu ta resalta den nos region. Un proyecto di innovacion den cultura na Aruba. E plataforma digital di Coleccion Aruba ta un proyecto den cual banda di digitalisa nos herencia cultural, ta haci uzo tambe di Inteligencia Artificial pa asina facilita e investigacion di e historia di Aruba y haci e informacion historico aki, mas accesibel pa nos comunidad. Esaki sigur ta haci Coleccion.aw un proyecto innovativo pa Aruba y tambe pa nos region. Danki na e plataforma di colaboracion Coleccion Aruba y Internet Archive, Aruba su herencia cultural ta universalmente accesibel.
