PROMÉ MINISTER SR. GILMAR PISAS A REUNÍ KU REPRESENTANTENAN DI CURANNACT
PROMÉ MINISTER SR. GILMAR PISAS A REUNÍ KU REPRESENTANTENAN DI CURANNACT
Willemstad – Promé Minister sr. Gilmar Pisas a reuní ku representantenan di Curannact dia 19 di aprel 2024.
Di parti di Curannact tabata presente sr. Alfred Rietkerk, sr. Edward Lichtveld, sra. Karen Hughes-Rietkerk i sra. Miriam de Windt.
Curannact ta un kompania establesé na Kòrsou ku ta enfoká pa trese den e region aki e último di teknologia global pa kuido preventivo, guiá pa estilo di bida i maneho di malesanan króniko.
Curannact a forma un asosashon ku Kannact, kual ta un kompania establesé na Estado Unido. Kannact tin lisensia eksklusivo pa usa su plataforma di kuido preventivo aki na Kòrsou.
Curannact ta hibando kombersashonnan aselerá ku e Ministerio di Salubridat Públiko, Medio Ambiente i Naturalesa, hòspitalnan, dòkternan i kompanianan di seguro, pa asina desaroyá un programa nobo kaminda dókternan di kas por traha djaserka ku “coach nan” di estilo di bida, pa guiá, evaluá i duna un mihó apoyo na personanan ku malesa króniko, manera Diabetes Mellitus, preshon haltu, malesanan cardiovaskular i sobrepeso, pa medio di aparatonan konektá na internèt.
E programa ta krea un struktura pa mantené mas di 100 kupo di trabou profeshonal, manera “coach” nan di estilo di bida i trahadonan di salú den barionan aki na Kòrsou.
Coachnan di estilo di bida i e trahadonan di salú den barionan lo keda reklutá di diferente komunidat i gruponan, ya asina e kuponan di trabou ta keda distribuí igual den diferente gruponan.
Programanan ku ta hasi uso di Kannact su plataforma, ta lokual ku Curannact ta basa su mes programa ariba, indikando ku:
Ø A redusí uso di (i) poliklínika ku 28%;
Ø A redusí (ii) HbA1c haltu den e populashon ku tin Diabetes Mellitus ku 1.6%;
Ø A redusí (iii) preshon sistóliko ku 19 punto den e populashon ku preshon haltu;
Ø A redusí (iv) uso di farmaséutiko kostoso pa kòntròl di Diabetes Mellitus ku 16%, pa medio di kambio di estilo di bida i salú ku a mehorá.
Analisis di Curannact ta indiká ku Kòrsou por spar te ku 79 miyón ANG pa aña pa salubridat públiko, ku otro palabra, e programa lo paga su mes.
E programa di prevenshon aki por redusí gastu pa remedinan i tratamentunan kostoso, ku normalmente ta bai pa kompanianan internashonal.
Promé Minister sr. Pisas a gradisí e representantenan di Curannact pa tur informashon balioso ku e la risibí i ta spera ku pronto dòkternan di kas, tur speshalista i organisashonnan relevante i konserní lo koperá pa introdusí e programa aki.






