Tene kuenta ku e siman aki santu di Sahara lo ta mas tantu i por okashoná molèster respiratorio i visual.

Tene kuenta ku e siman aki santu di Sahara lo ta mas tantu i por okashoná molèster respiratorio i visual.

 

Willemstad – Un atvertensia general ta bai na tur Suidadano di Kòrsou, pa tuma nota ku den e dianan ku a pasa, a tuma nota di oumento di santu di Sahara ku ta aserkando nos isla.

 

Espesialmente e siman aki, di akuerdo ku pronóstiko, e santu di Sahara aki lo pasa riba nos isla i lo por okashoná tantu molèster respiratorio komo molèster visual.

 

Kada aña di nobo nos ta keda konfrontá ku e fenómeno di santu di Sahara for di kontinente Afrikano. E santu aki ta un faktor importante den ekologia mundial komo ku e ta kontené nutriente ku ta fertilisá por ehèmpel selva di Amazona, pero e santu ta influensiá tambe kalidat di nos airu kual por okashoná difikultat respiratorio leve serka sierto hende.

 

Esaki komo ku huntu ku e santu (stòf) tin otro materialnan orgániko i kímiko ku tambe ta sirkulá den airu. E materialnan aki por hasi e alergia di un persona pió òf kousa síntoma di problema di respirashon.

 

Aki algun prekoushon ku nos por tuma.

Personanan ku tin problema ku respirashon i alergia mester tuma e siguiente prekoushonnan durante e dianan ku tin e santu di Sahara riba Kòrsou:

 

• Keda mas tantu posibel paden di kas, ku bentana será.
• Ku ta posibel evitá di usa fèn, paso esaki ta produsí koriente di airu ku ta plama e partíkulanan.
• Laba filternan di èrko di kas i di outo frekuentemente, si ta posibel, tur dia.
• Limpia muebelnan di kas ku un paña muhá pa kita stòf. Evitá di sakudí e  paña p’e no plama e stòf.
• Si bo ta sufri di alergia, usa e remedinan anti- alérgiko ku dòkter a

preskribí pa bo.

• Tene bentana di outo será i usa èrko mas tantu posibel.

 

 

 

Pa mas informashon por tuma kontakto ku bo dòkter di kas. Pa update tokante santu di Sahara, follow e Facebook Page di Meteorologia Department Curaçao i tambe di Ministerio di GMN.