Women’s Steering Committee ku yamada pa traha huntu pa redusí uso di produktonan di plèstik
Komunikado di prensa di Women’s Steering Committee Curaçao – pa publikashon inmediato
Women’s Steering Committee ku yamada pa traha huntu pa redusí uso di produktonan di plèstik
WILLEMSTAD – Riba 22 di aprel 2024 mundu pa selebrá Dia di Mundu (Earth Day). Dia riba kua, desde su promé selebrashon na 1970, mundu ta para ketu na e ophetivo pa huntu traha riba un planeta mas sostenibel. Pa aña 2024 Nashonnan Uní a skohe komo lema; ‘Planeta kontra Plèstik’. “Nashonnan Uní (UN), ta urgi komunidatnan pa traha dirigí pa na 2030 yega na eliminashon di uso di produktonan di plèstik ku ta usa un biaha. Meta di e esfuersonan mester resultá den redukshon di 60% en general di plèstik pa asina garantisá un mundu mas sostenibel i un medio ambiente sanu pa futuro generashonnan,” sra. Lourens – de Lanoy, presidente di Women’s Steering Committee Curaçao (WSCC), a bisa en konekshon ku opservashon di ‘Earth Day 2024’.
“Ku beneplásito direktiva di WSCC a tuma nota ku un mayoria den nos parlamento a vota pro pa nos lei di plèstik; pa stòp ku uso di produktonan di plèstik i foam ku ta usa un biaha. Esaki despues ku e otro islanan di eks – Antia Hulandes, otro paisnan den Karibe i vários pais, pa medio di legislashon, a prohibí uso di produktonan di plèstik ku ta usa solamente un biaha. Nos ta spera ku e akshon no ta keda na aprobashon di nos ‘lei di plèstik‘ so, pero ku lo publiká e lei riba término korto, i gobièrnu bin ku un maneho pa implementashon di e ‘lei’, sra. Lourens – de Lanoy a sigui bisa. “Ta un responsabilidat di, no solamente Gobièrnu, pero di kada siudadano, empresa i organisashon pa salbaguardiá un medioambiente salú. Mihó kuido di medio ambiente mester ta haltu den tur nos akshonnan. E mester bira un ‘mindset’. Pa nos djis post ‘happy earth day’ riba nos retnan sosial sin traha serio pa ofresé nos yunan i nietunan un isla riba kua nan por biba ‘happy’ no ta un muestra di ta un siudadano responsabel. Ban duna kontenido na e yamada di ‘planet vs. plastic’ di UN. Den nos kaso, e lucha mester bira ‘Curaçao vs. Plastic’. Empresanan tambe mester hasi tur loke ta nan alkanse pa ofresé produktonan den empake sostenibel. Ta importante pa ta konsiente ku e kambio deseá ta kuminsá serka bo mes. Ban p’e! Direktiva di Women’s Steering Committee Curaçao ta deseá un Dia di Mundu (Earth Day) ku nos por rekordá komo unu riba kua nos a empoderá nos kompromiso pa eliminá uso di produktonan di plèstik i ‘foam’ ku ta usa un biaha i redusí uso di plèstik en general,”e presidente di WSCC a terminá bisando. “
