ÈKSAMEN FINAL SENTRAL 2024 VSBO, HAVO, VWO
MINISTERIO KONSERNÍ ENSEÑANSA, SIENSIA, KULTURA & DEPORTE
ÈKSAMEN FINAL SENTRAL 2024 VSBO, HAVO, VWO
PUBLIKÁ RIBA 05 MEI 2024
Despues di un periodo di preparashon tantu alumnonan, skol, direktivanan di skol komo Sentro di Èkspertisia pa Prueba & Èksamen (ETE) i mayornan, un total di 1813 (2023: 1961) kandidato pa èksamen di 22 skol di Kòrsou, ta kuminsá ku nan èksamen sentral final pa vsbo, havo i vwo.
Durante mas ku tres siman kandidatonan pa èksamen na Kòrsou ta traha nan èksamen ku ta determiná si nan a sera nan periodo na vsbo òf havo òf vwo ku éksito. Hopi ta sigui, despues di e éksito akí, ku un estudio na un instituto di enseñansa mas avansá adekuá, sea lokalmente òf na otro pais. E aña aki ta di 20 biaha ku tin èksamennan final pa vsbo i e kantidat di mas grandi di studiantenan ta bini di enseñansa profeshonal sekundario preparatorio (vsbo). Den vsbo ta hasi distinshon entre tres trayekto edukativo: PBL (Trayekto edukativo Profeshonal Práktiko), PKL (Trayekto edukativo Práktiko pa formashon di Kader) i TKL (Trayekto edukativo Teóriko pa formashon di Kader). Den e skema 1 por tuma nota di e dianan i kantidat di alumnonan ku ta kuminsá ku nan èksamen pa e aña aki.
Skema 1:
| Periodo di èksamen sentral pa havo/vwo ta kuminsá 6 di mei 2024 | ||||
| Kantidat di
Alumno |
Total | havo | vwo | — |
| Enseñansa Avansá | 697 | 539 | 158 | — |
| Periodo di èksamen sentral pa vsbo ta kuminsá 6 di mei 2024 | ||||
| Kantidat di
Alumno |
Total | vsbo-pbl | vsbo-pkl | vsbo-tkl |
| VSBO | 1116 | 238 | 277 | 601 |
Den e skema 2 por tuma nota di un komparashon di e kantidat di alumno ku a partisipá na èksamen sentral durante aña 2023 i 2024.
Skema 2:
| VSBO (kantidat di alumno) | 2023 | 2024 | Diferensia |
| VSBO-tkl | 676 | 601 | – 75 |
| VSBO-pkl | 355 | 277 | – 78 |
| VSBO-pbl | 261 | 238 | – 23 |
| E kantidat total di skolnan vsbo ku ta pasa e èksamennan final ta 16. | |||
Den e skema 3 por tuma nota di komparashon di kantidat di alumno di havo/vwo pa aña 2023 i 2024.
Skema 3:
| Havo/Vwo (kantidat di
alumno) |
2023 | 2024 | Diferensia |
| Havo | 526 | 539 | + 13 |
| Vwo | 143 | 158 | + 15 |
| E kantidat total di skolnan havo ku ta pasa e èksamennan final ta 9 i di nivel vwo 7. | |||
Roster pa èksamennan sentral ta kuminsá segun e skema 4:
Skema 4:
| Skol-Nivel | Fecha | Èksamen |
| HAVO-VWO | 6 di mei 2024 | Hulandes |
| VSBO-pbl, pkl, tkl | 6 di mei 2024 | Hulandes |
| Èksamen práktiko pa pbl i pkl a tuma lugá di 8 di aprel 2024 te ku 26 di aprel 2024. | ||
Promé periodo pa èksamen sentral ta finalisá segun e skema 5
Skema 5:
| Skol-Nivel | Fecha | Èksamen |
| VSBO-pbl/pkl | 23 di mei 2024 | Matemátika |
| VSBO-tkl | 27 di mei 2024 | Kimika/Físika |
| HAVO-VWO | 28 di mei 2024 | Havo: Biologia
Vwo: Franses |
Di dos periodo (repaso) pa èksamen sentral ta tuma lugá segun e skema 6.
Skema 6:
| Skol-Nivel | Fecha | Remarke |
| VSBO práktiko (CSPE) | 30 di mei te ke 5 di yüni 2024 | |
| VSBO-pbl/pkl/tkl | 18 te ku 25 di yüni 2024 | 6 dia na luga di 2 siman (10 dia) 2023 |
| HAVO-VWO | 18 te ku 25 di yüni 2024 | 6 dia na luga di 2 siman (10 dia) 2023 |
Resultado èksamennan final
ETE ta responsabel tambe pa fiha e normanan di e èksamennan. Esaki ta tuma lugá basá riba análisis sientífiko. Pa mas tardá 11 di yüni 2024 ta manda e normanan, di èksamennan lokal, pa e promé periodo di èksamen pa tur skol. Ta manda e normanan di e di dos periodo 28 di yüni 2024.
Liña di èksamen ETE
Pa reakshon i opservashon tokante e èksamennan, ETE tin un liña di èksamen. A organisá e liña di èksamen segun grupo di vak i e ta intenshoná pa skol, kandidato i otro interesadonan. Pa medio di e liña di èksamen por raportá problema i hasi opservashon i remarke tokante e èksamennan. Naturalmente por raportá reakshonnan general tambe tokante èksamennan. E liña di èksamen-ETE ta registrá i ordená tur e notifikashonnan segun grupo di vak, ku despues profeshonalnan di konstrukshon di èksamen di ETE ta atendé ku e koutela nesesario. Dependiendo di e tipo di notifikashon, ta atendé esaki direktamente durante òf despues di e periodo di èksamen. E liña di èksamen ta alkansabel den e periodo di èksamen na e number di telefòn general 4343-710, 4343-766. Tambe por manda reakshon na e e-mail adrès helpdesk@ete.cw.
Sentro di Ekspertisia pa Prueba & Èksamen (ETE) i e kolaborashon entre paisnan den Reino
Sentro di Ekspertisia pa Prueba & Èksamen (ETE), e organisashon ehekutivo den Ministerio di Enseñansa, ta responsabel pa entre otro, konstrukshon, tradukshon, produkshon, distribushon i determinashon di normanan pa Èksamennan Sentral Final pa Enseñansa Avansá. ETE ta produsí un total di 116 èksamen vsbo pa aña (promé i di dos periodo) i 28 èksamen pa havo i vwo (promé i di dos periodo). E produkshon di èksamen ta kuminsá mas ku 1,5 aña delantá teniendo kuenta ku e kalidat ku mester ta garantisá. Èksamennan ku ta bini for di Hulanda, ta prinsipalmente èksamennan pa havo i vwo. Di un kantidat di èksamen vmbo-gl-tl (=vsbo tkl) ku ta bini for di Hulanda ta hasi un screening delantá pa loke ta un konteksto adekuá. E trabou ku ETE ta hasi ta unu di hopi presishon i eksaktitut ku ta tuma lugá den kuadro i planifikashon estrikto.
Apesar di e posishon independiente di e otro paisnan den Reino ta eksistí ainda un kolaborashon riba tereno di e èksamennan sentral ku Hulanda i Sint Maarten. Tantu pa Boneiru i Sint Maarten, ETE ta entregá te ainda (for di 10-10-10 basá riba un akuerdo di servisio) e èksamennan sentral pa enseñansa avansá, ku ETE ta desaroyá. E kantidat di èksamen pa Boneiru a bira den transkurso di añanan hopi ménos relashoná ku introdukshon di e lei di enseñansa hulandes riba e asina yamá islanan BES. Awendia, den konteksto di *kuater pais (vierlandencontext) (Hulanda inkluso BESS-eilanden, Aruba, Kòrsou i Sint Maarten), ta traha huntu tambe ku departamentu di Enseñansa, unidat di servisio di èksamen, Aruba.
Tambe ETE ta tradusí èksamen na papiamentu pa e skol SKAIH pa PBL, PKL i TKL (e úniko skol ku papiamentu komo idioma di instrukshon) pa algun èksamen lokal i sierto èksamen for di Hulanda. Pa Sint Maarten ETE ta hasi tradukshon na ingles pa PBL i PKL di un kantidat di èksamen lokal. Riba wèpsait di ETE por konsultá e èksamennan bieu i modelonan di korekshon. Tambe por download despues di èksamen e modelonan di korekshon di e promé periodo di e èksamennan konstruí pa ETE, for di http://www.ete.cw.
Éksito!
Finalmente Minister di Enseñansa, Siensia, Kultura i Deporte i e tim di Sentro di Èkspertisia pa Prueba & Èksamen (ETE) ta deseá tur kandidato di èksamen, mayornan i skolnan sabiduria, forsa i hopi éksito ku èksamennan final.
*********************************
Anekso: Roster pa èksamennan sentral vsbo-pbl/pkl/tkl, havo i vwo 2024
Anekso 1 : Rooster CE HAVO 1e tv 2024
Anekso 2: Rooster CE VSBO PBL 1e tv 2024
Anekso 3: Rooster CE VSBO PKL 1e tv 2024
Anekso 4: Rooster CE VSBO TKL 1e tv 2024
Anekso 5: Rooster CE VWO 1e tv 2024
