Presentashon “Preis di kombustibel i otro produktonan” 3 ougùstùs 2020
Presentashon “Preis di kombustibel i otro produktonan” 3 ougùstùs 2020
Geplaatst op 04 August 2020 dor di Ministerio Desaroyo Ekonómiko
WILLEMSTAD – Pa algun luna kaba nos refineria tabata inaktivo i komo konsekuensia di esaki e kombustibel nesesario mester a keda importá dor di Curoil pa asina por a garantisá suministro regular i funshonamentu nòrmal di Kòrsou. Na luna di febrüari di e aña aki, Gobièrnu di Kòrsou a anunsiá introdukshon di e promé faseta di un rekargo temporal riba preis di produktonan petrolero pa konsumo lokal. E promé faseta aki lo a drenta na vigor dia 3 di mart 2020 ku e meta pa por a sigui garantisá suministro di kombustibel na Kòrsou miéntras tabata warda nos refineria bira operashonal atrobe.
Na e momento di introdukshon di e rekargo aki, Gobièrnu a anunsiá tambe ku e intenshon lo tabata pa masoménos na luna di aprel di e aña aki introdusí e di dos faseta; tur esaki ku e enfoke ku pa luna di yüli tabata sperá ku e operador nobo di nos refineria lo a tuma over.
E pandemia di COVID-19 a trese kuné hopi kambionan inesperá, entre otro kambio den e plan i desaroyonan rondó di nos refineria. Na inisio di aña, tur kos tabata indiká ku pa luna di yüli último e operador nobo di refineria lo mester a tuma over i esaki lo a trese kuné ku e gastunan lo no mester a keda reflehá mas den e preis di kombustibel ku komunidat ta paga pa entre otro gasolin, koriente, awa i gas. Den e periodo di yanüari te ku yüli 2020 Curoil a bin ta prefinansiá e gastunan aki bou di e espektativa ku e operador nobo lo a inisiá pa luna di yüli i ku e gastunan hasí den e periodo promé ku esaki lo a keda pagá bèk den un lapso di 4 aña.
Realidat ta, ku na e momentunan aki no tin un espektativa ainda pa ki dia nos lo por spera ku e operador nobo di refineria lo tuma over i mirando esaki e gastunan pa Curoil sigui prefinansiá lo bira muchu haltu. Konsekuensia inevitabel di esaki ta, ku e gastunan lo bai reflehá den nos produktonan energétiko i lo kondusí na un oumento den tarifanan pa e konsumidó.
Gobièrnu di Kòrsou ta konsiente di e situashon ekonómikamente delikado ku nos pais ta konfrontá na e momentunan aki i pa e motibu aki a trata di tene kuenta pa e oumento di tarifanan aki tin ménos impakto posibel riba produktonan ku komunidat ta konsumí. Gobièrnu a risibí konseho di Bureau Telecommunicatie & Post (BT&P) komo e instansia lokal responsabel pa rekalkulashon periódiko di entre otro preisnan di produkto petrolero. Basá riba esaki i ku e meta pa sigui garantisá suministro di produktonan petrolero pa nos komunidat, a yega na e desishon pa entrante djamars 04 di ougùstùs di e aña aki introdusí un oumento a base di e siguiente tabèl:
| Produkto | Unidat | Subida (%) | Subida (NAF) | Tarifa nobo (NAF) |
| Gasolin (Mogas 95) | NAF/Ltr | 4.95% | 0.087 | 1.846 |
| Diesel (Gasoil LSD) | NAF/Ltr | 7.24% | 0.099 | 1.466 |
| Bòm di gas grandi (LPG 100 lbs) | NAF/Cyl | 16.67% | 10.00 | 70.00 |
| Bòm di gas chikí (LPG 20 lbs) | NAF/Cyl | 16.67% | 2.00 | 14.00 |
| Koriente | NAF/kWh | 4.5% | 0.0252 | 0.5824 |
| Awa | NAF/M3 | 2.9% | 0.2911 | 10.4744 |
Gobièrnu di Kòrsou ta kombibí ku komunidat i lo kontinuá pa hasi lo nesesario pa optimalisá funshonamentu di nos kadena energétiko. BT&P lo sigui mónitòr i periódikamente hasi rekalkulashonnan nesesario pa asina purba pa e gastunan reflehá ménos posibel riba konsumo di komunidat.
‘Download’ aki e presentashon di Minister Martina di Desaroyo Ekonómiko.
