Minister Pisas a bishitá diferente siudadano ku a sufri daño durante e fuerte awaseru di djabièrnè
Minister Pisas a bishitá diferente siudadano ku a sufri daño durante e fuerte awaseru di djabièrnè
Willemstad – Minister Pisas ayera djamars a hasi un rekorido na Banda Bou na diferente sitio ku a sufri daño durante e fuerte awaseru di djabièrnè último. Primeramente Minister Pisas a bishitá Hòfi Mango pa personalmente tuma nota di e daño. Despues Minister a hasi diferente bishita, entre otro na kasnan di famia i asilio di animal. Na algun sitio a yuda personanan ku tabatin bastante daño di awaseru.
Na Hòfi mango Minister Pisas a haña un rekorido riba e tereno pa personalmente tuma nota di e daño. Despues a sali pa un kas di famia na Fontein kaminda huntu ku kolaboradónan di Obranan Públiko a hasi uzo di drone pa mira kiko por hasi den e paisahe pa evitá ku e kas aki ta haña molèster di awa den futuro. Despues a sigui pa Rescue Paws kual ta un asilo di kacho den área di Fontein kaminda Minister Pisas a haña un rekorido na e sentro i alabes a informá Minister di e daño ku nan a sufri di awa i e trabounan ku nan ta hasi pa aliviá e problemátika di kachonan bandoná riba kaya.
Despues a bishitá un adrès na Pannekoek kaminda koriente fuerte di awa a traha un buraku bastante grandi dilanti porta di kurá di un siudadano. Despues di e awaseru e siudadano a kana bai pafó i kai den e buraku ku tabata hundu i yená ku awa. Obranan Públiko tabata na e sitio i pa medio di loader i un trùk di tera a aliviá e siudadano di su problema. Despues a sigui pa playa di Sta. Cruz kaminda awaseru a lòs kantidat grandi di tera for di seru manda abou i kibra un muraya ku konsekuentemente a kai riba outo di e siudadano. Pa medio di loader a saka e tera i e parti di muraya pa asina por a saka e outo. Durante dianan benidero lo sigui limpia kareteranan i yuda siudadanonan ku a sufri daño di awaseru