ENTRADA DI IMPUESTO PA APREL HOPI MAS HALTU KU LOKE A PRESUPUESTÁ

ENTRADA DI IMPUESTO PA APREL HOPI MAS HALTU KU LOKE A PRESUPUESTÁ

Luna di aprel a sera atrobe di un forma hopi positivo, pa loke ta trata entrada di impuesto i primanan sosial. E entrada di impuesto tabata no ménos ku 18,9 mion florin (17,4%) mas haltu ku loke a presupuestá i e entrada di prima sosial a resultá 6,2 mion florin (9,5%) mas haltu ku e presupuesto. E motibu prinsipal pa e entrada di impuesto mas haltu, ta e entrada di impuesto riba ganashi mas haltu risibí. Komo empresarionan tabatin e oportunidat pa kumpli ku e deklarashon provisorio di 2023 te ku 2 di aprel, na aprel ainda a risibí 19,0 mion florin na impuesto riba ganashi for di e deklarashon provisorio di 2023.

Den e gráfiko athunto por tuma nota di e desaroyo di entrada, durante e promé 4 lunanan di aña for di 2017 te ku awor.

Ademas di e impuesto riba ganashi adishonal risibí, e entrada di impuesto riba benta tambe ta mas haltu ku loke a presupuestá: 55,9 mion florin kompará ku 50,0 mion florin. De montante aki, Duana a kolektá 15,1 mion florin. Den e promé 4 lunanan, Duana a kolektá 55,0 mion florin di impuesto riba benta. Esaki ta 19,0% mas ku den e promé 4 lunanan di 2023 (46,2 mion florin). E entrada di OZB te ainda ta keda kana hopi atras for di presupuesto. Resientemente a kuminsá imponé aanslagnan di OZB pa aña 2024. Pa komplementá, e departamentu di OZB di Ofisina di Impuesto lo risibí refuerso temporal pa eliminá retrasonan atministrativo. Relashoná ku esaki, ta spera tambe ku lo rekuperá e retraso di entrada di OZB durante e aña akí.