Bishita na resepshon riba e Barku Esmeralda

WILLEMSTAD – Minister di Enseñansa, Siensia, Kultura i Deporte sr. Sithree van Heydoorn a keda invitá dor di Konsul di Chile na Kòrsou sr. Ramfis A. Gonsalez i Kapitan sr. Fernando Méndez Cañas na resepshon ofishal di e Barku Esmeralda.

Huntu ku Minister di Tráfiko, Transporte i Planifikashon Urbano sr. Charles Cooper, Minister di Desaroyo Ekonómiko sr. Ruisandro Cijntje i Minister di Maneho di Gobernashon, Planifikashon i Servisio Públiko sr. Ornelio Martina a hasi akto di presensia na e resepshon riba e barku na Matheywerf. Durante di e anochi a sera konosí i kombersá ku vários persona prominente di komunidat pa asina por sigui traha riba un mihó laso entre e paisnan Kòrsou i Chile. Alabes e dos paisnan a presentá algun baile kultural di kada un i gosa di gastronomia di Chile. Esaki ta aktividatnan ku ta stimulá hermandat i krea mas posibilidat pa nos pais.