Minister Cijntje a inkluí mayoria punto di atenshon di Parlamentario Seferina den e plan di mehorashon pa nos sentro di siudat

Minister Cijntje a inkluí mayoria punto di atenshon di Parlamentario Seferina den e plan di mehorashon pa nos sentro di siudat

 

 

Miembro di Parlamento pa frakshon di MFK, David Seferina a dirigí un karta ku pregunta dia 17 di yanüari último ku vários punto di atenshon pa Minister di Desaroyo Ekonómiko sr. Ruisandro Cijntje, awe ta kumpli 122 dia sin a risibí kontesta riba esaki.

 

Suskrito a enfoká den e karta ku tin hopi turista den nos sentro di siudat pero no tin aktividat pa brinda e turista e eksperensia kultural ni tampoko sera konosí ku nos paisahenan. Banda di esaki no tin un punto di informashon (kiosko) ku ta duna bista di loke nos sentro di siudat tin pa ofresé. Tambe suskrito a tuma nota ku e sentro di siudat den ora nan di anochi ta bira manera un “GHOST TOWN” i ku tur e konsekuensianan ku esaki por tin pa seguridat di habitantenan i bishitantenan.

 

Informashonnan ku suskrito ta dispone di dje ta ku Minister Cijntje a duna instrukshon pa DMO traha un plan stratégiko pa transformá Punda den un destinashon atraktivo pa habitantenan i bishitantenan di nos isla. E plan aki a wòrdu presentá den fin di aprel 2024 na San Marco Hotèl den presensia di partidonan interesá i tambe gobièrnu di Kòrsou. Den e presentashon a trese mayoria punto dilanti ku suskrito a trese dilanti den e karta fechá 17 di yanüari 2024.

 

Apesar ku e karta di 17 di yanüari último no a wòrdu kontesta pa Minister Cijntje konforme e obligashon den e protokòl firma entre Parlamento i Gobièrnu, suskrito lo keda satisfecho si Gobièrnu por kristalisá e plan ku a wòrdu duna na gobièrnu si e ta na bienestar di nos habitantenan.

 

 

Atentamente,

 

 

___________

David Seferina

Miembro di Parlamento

Pa Frakshon di MFK