MINISTER DI HUSTISIA SHALTEN HATO TA BISHITÁ KORTE DI KASASHON NA HULANDA

Den kuadro di un bishita di trabou ku Minister di Hustisia Shalten Hato tin na Hulanda, djaweps 16 di Mei 2024 komo Minister huntu ku su delegashon e la bai di bishitá na e ofisina di Korte di Kasashon na Korte Voorhout na Den Haag. Durante di e bishitá, Minister Hato a sera konosí ku presidente di Korte di Kasashon, sra. Dineke De Groot.

E bishitá na Korte di Kasashon aki ta den kuadro pa sondia e posibilidatnan ku Statüt ta ofresé na e paisnan di Karibe Hulandes pa por nombra un miembro den Korte di Kasashon i e deseo di Kòrsou pa inisiá e kaminda pa esaki ser realisá. Ta ampliamente konosí ku na vários okashon tin diferente kasonan den Korte di Hustisia ku ta bai pa apelashon i despues ta sigui e trayekto pa Kasashon. Den kuadro di esaki ta importante ku nos paisnan den Karibe Hulandes tambe por nombra un miembro pa forma parti di e Kolegio aki. Esaki lo ta un balor agregá pa e diferente kasonan di parti di pais Kòrsou ku na diferente okashon ta ser trata den Korte di Kasashon na Den Haag.

Despues di e kombersashon ku Minister di Hustisia Shalten Hato a sostené ku Presidente di Korte di Kasashon, sra. De Groot komo Minister di Hustisia e la vosiferá e deseo di parti di pais Kòrsou pa inisiá ku trámite i e proseso pa logra esaki. Awor komo Minister di Hustisia huntu ku Gobièrnu di Kòrsou lo mester hasi un petishon ofisial na tur demas paisnan di Karibe Hulandes pa hasi un apelashon na e artikulo 23 insiso 2, kual ta indika tekstulamente: “Indien de regering van Aruba, Curaçao of Sint Maarten dit verzoekt, wordt bij deze rijkswet de mogelijkheid geopend, dat aan de Raad een lid, een buitengewoon of een adviserend lid wordt toegevoegd.” Ku esaki awor Minister di Hustisia, mr. Shalten Hato lo akudí na e otro paisnan den reino pa risibí un kontesta pa por nombra un miembro den Korte di Kasashon.