KONSEHO I AKSHON DI PREPARASHON DI PARTI DI MINISTERIO DI ESKD PA KU SITUASHON DI WER.
KONSEHO I AKSHON DI PREPARASHON DI PARTI DI MINISTERIO DI ESKD PA KU SITUASHON DI WER.
WILLEMSTAD – Ministerio di Enseñansa, Siensia, Kultura i Deporte (ESKD) a tuma kontakto ku direktivanan di skolnan pa prepará i tuma akshon pa ku e situashon di wer. Gobièrnu a konsehá direktivanan i duna konseho pa prepará i tene kuenta ku e siguiente puntonan:
Tur skol mester tin un plan di emergensia: Den e kaso akí mester aktivá e parti relashoná ku kaida di hopi awa. Esaki mester tin e parti di seguridat, evakuashon, komunikashon i protekshon di e lokalidat. Pa un mihó sinkronisashon, ta konsehá tene kontakto di bisiñanan den bario di e skol, number di telefòn di polis, ambulans, Aqualektra i tur number di emergensia na man;
Komunikashon i informashon: Implementá un sistema di informashon for di tempran via di sms, app, mayor, alumno, ku personal via di mail, un app spesial òf yamada di telefòn den kadena;
Seguridat i protekshon di infrastruktura di skol: Hasi inspekshon na e infrastuktura di e lokalidat di skol i laga drecha esakinan mas pronto posibel. Den kaso ku tin punto ku mester di mas atenshon, tene kuenta ku esaki i hasi anotashon di e puntonan mesora den e plan di emergensia. Purba di tin protekshon nesesario den kaso di hopi awa (saku di santu, pòmp, i mas);
Evakuashon i ‘shelter’: Informá henter e personal di e ruta di evakuashon i tene e ruta di evakuashon limpi. Laga pa esaki ta visibel den kaso di hopi awa. Identifiká lokalidatnan di peliger i asigná un ‘shelter’ den kaso di emergensia.
Edukashon i maneho di informashon: Sigui e kanalnan di informashon verídiko di Gobièrnu. Tene seshon informativo/charla ku mayor-, dosente- i alumnonan pa sa kiko hasi den kaso di kalamidat. Tambe komo direktiva di skol, pone un plan di maneho i informá tur ‘stakeholder’ di esaki.
Tene kuenta ku enseñansa na distansia: Den kaso ku no por hasi uoo di e lokalidat di skol, sea prepará pa implementashon di enseñansa na distansia. Purba di laga dosente i alumno komuniká i sigui e sistema di enseñansa via e plataforma digital.
Kooperashon i kolaborashon ku outoridatnan lokal: Koordiná tur informashon den kooperashon ku e instansianan di gobièrnu verídiko pa traha riba plannan di emergensia i ehekutá esakinan konforme e prosedura akordá. Den kaso di emergensia, informá mesora i koordiná esaki ku e outoridatnan outorisá.
Esaki ta algun di e puntonan ku Ministerio di ESKD a informá i konsehá tur e direktiva di skolnan pa ku e situashon di wer. Naturalmente tin hopi punto mas di importansia, pero esakinan ya ta tratá kaba ku e direktiva di skolnan. Pa kasonan di emergensia semper por komuniká ku ministerio na Communicatie@owcs.gov.cw pa informashon.
