REDUKSHON DI 50% RIBA KAMBIO DI LEI DI SHUSHI PA DEPOSITA SHUSHI NA LANDFILL MALPAIS A WORDU ENTREGA DOR DI FRAKSHON DI MFK NA PARLAMENTO I YA ESAKI A PASA SER I AWOR TA NA RVA PA KONSEHO I DESPUES LEI REGRESA BEK NA PARLAMENTO PA TRATAMENTU:

REDUKSHON DI 50% RIBA KAMBIO DI LEI DI SHUSHI PA DEPOSITA SHUSHI NA LANDFILL MALPAIS A WORDU ENTREGA DOR DI FRAKSHON DI MFK NA PARLAMENTO I YA ESAKI A PASA SER I AWOR TA NA RVA PA KONSEHO I DESPUES LEI REGRESA BEK NA PARLAMENTO PA TRATAMENTU:

WILLEMSTAD — A bolbe lanta diskushonnan tokante e tema di limpiesa general, bashamentu ilegal di shushi na sitionan no apropiá, kimamentu di shushi i transporte di shushi i otro materialnan na Kòrsou. Apesar di esfuersonan di Ministerionan di GMN, VVRP, OWCS, MEO i Selikor NV i organisashonnan boluntario, Kòrsou ta enfrentá un shushedat i un tiramentu di shushi na sitio no apropiá alarmante.

E situashon ta pidi pa Gobièrnu tuma medidanan mas pronto i fuerte pa limpiesa general i habri portanan di Landfill Malpais grátis pa esnan ku ta transportá  i  depositá e shushi Landfill sin mester paga pa esaki i implementá kontrolnan severo riba depositamentu di awanan i material shushi na sitionan no apropiá i tambe e manera ku e shushi i otro materialnan ta wòrdu transportá. E limpiesa mester sirbi tambe pa den kuadro di mensahenan klave ku Gobièrnu di Kòrsou ta alerta komunidat riba pronóstikonan di posibel yobidanan fuerte ku ta den direkshon di Kòrsou den e próksimo dianan binidero i tambe pa e temporada di orkan ku ta kuminsá den luna di yüni 2024 i evitá inundashon di kasnan ku ta yena ku awa, pèrdida di bienesnan i malesanan ku esaki por trese i krea manera brote di sangura i dengue.

Tin hopi reklamo di parti di transportadónan ku ta tira shushi ilegal unda ku ta, ku ta keha ku e preis ku ta kobra pa shushi ta haltu i ku e proseso di pisa vehíkulo na entrada i salida ta tarda hopi. Nan ta sugirí pa amplia e orario di sera landfill pa un tiki mas lat i pa atendé e problema di karchi di kùr kaduká di e vehíkulo. Nan ta di opinion ku lo mester por identifiká nan mes ku  un ID bálido na momentu ku e karchi di kùr ta kaduká i tur esakinan ta motibunan pa un transportadó di shushi depositá e shushi na sitionan no apropiá.

Pa mehorá e kontrol i vigilansia, ta proponé un sistema di monitorio ku kámaranan 24 ora pa dia. Den kombinashon ku vários Ministerionan i kuerponan di seguridat por hiba un bon kontrol i banda di esakinan bini ku un kampaña di informashon i konsientisashon kon ta anda, transportá i na unda mester depositá shushi. Tambe a proponé un enfoke na resiklahe, depósito riba bòter i bleki i tambe  kima shushi pa generá energia, ku Gobièrnu di Kòrsou, Selikor NV i kompanianan priva ku ta den e sektor aki konhuntamente mester sigui desaroyá.

Na e momentunan aki tin un kambio den e proyekto di Lei di shushi ku Frakshon di MFK a entrega na Parlamento di Kòrsou ku ta un redukshon di 50% di e loke ku awor aki Selikor NV ta kobra riba kada 1000 kilo pa tira sushi na Landfill Malpais ku ya a pasa pa serka SER i na e momentunan aki ta na RVA pa konseho i pa despues esaki bini bek parlamento pa tratamentu.

E meta di gobièrnu mester ta pa mantené Kòrsou limpi, promové redusí, re-usa i resiklá shushi, krea trabou pa hendenan lokal i konsientisá tantu abitantenan lokal i bishitantenan di nan responsabilidat pa ku medio ambiente, naturalesa i desaroyonan sostenibel.

Finalmente, Frakshon di MFK den Parlamento ta invitá públiko pa sostené limpiesanan boluntario, ku ta wòrdu organisá regularmente, pa logra un Kòrsou mas limpi i bunita.

Juniel R. Carolina                                                                                                                              

Parlamentario MFK