MINISTERIO DI HUSTISIA TA INVERTÍ DEN SUBI INTEGRIDAT BOU DI SU TRAHADÓNAN
MINISTERIO KONSERNÍ HUSTISIA
MINISTERIO DI HUSTISIA TA INVERTÍ DEN SUBI INTEGRIDAT BOU DI SU TRAHADÓNAN
PUBLIKÁ RIBA 27 MEI 2024
MEI 2024 – Integridat na Kòrsou ta un di e balornan núkleo di e Programa di Gobernashon 2022- 2025 “Na kaminda pa rekuperashon i un mihó kalidat di bida pa komunidat”. Ta un di e prioridatnan di kabinèt Pisas II i ta indiká ku ta aktua konforme norma i balor i prinsipionan vigente i ku leinan i reglanan ta wòrdu respetá. Den e plan stratégiko di Ministerio di Hustisia tin komo meta inkorporá pa enforsá e ministerio pa medio di entre otro sòru pa un gobièrnu konfiabel, sólido i integro. Esakinan ta kondishonan importante pa por duna kontenido na e atendimentu gubernamental komo parti di e aserkamentu integral di krimen ku ta debilitá nos komunidat.
Ministerio di Hustisia, ku asistensia di ‘Actiecentrum Ondermijning Curacao (ACOC)’, a kuminsa un trayekto dual riba e tereno di integridat. Den e aserkamentu akí, lo enfoká riba ‘low hanging fruits’: akshonan ku ta elevá integridat ku fásilmente por wòrdu implementá manera introdukshon di huramentashon bou di trahadónan nobo. Banda di esaki, lo traha riba desaroyo di un sistema di integridat duradero pa e ministerio.
Pa e trahadónan ku lo ta involukrá den e proseso pa desaroyá un sistema di integridat pa Ministerio di Hustisia, ta importante ku nan ta na altura di desaroyonan nobo riba tereno di integridat i ta konsiente kon di un manera sistemátiko, instrumentonan hurídiko, organisatorio i prosedural por wòrdu usá pa realisá un aserkamentu duradero.
Den e kuadro akí, trahadónan di Ministerio di Hustisia, den e lunanan di aprel i mei, a partisipá na algun kurso riba tereno di integridat ku na Kòrsou ta wòrdu duná dor di SRA-Caribbean, kual ta spesialisá riba e area di integridat.
