Dianan di kalor bou di kòntròl na SDKK, KPC i Brantwer Kòrsou
Dianan di kalor bou di kòntròl na SDKK, KPC i Brantwer Kòrsou
Despues di kódigo hel ku Servisio Meteorológiko Kòrsou a emití e último dianan aki, Minister di Hustisia Shalten Hato a aserka mando di e.o. SDKK, Kuerpo Polisial Kòrsou i tambe Brantwer Kòrsou pa risibí un “update” kon a trata ku e klientenan pero tambe koleganan trahadó di e diferente organisashon hudisial aki. Serka tur 3 organisashon Minister a risibí e grato notisia ku nan a tuma medidanan èkstra mesora pa fasilitá koleganan for di e inmenso kalor.
Alabes Sentro di Detenshon I Korekshon Kòrsou a informá Minister di Hustisia tambe ku nan a tuma medida di prekoushon temporal pa e detenidonan pa evitá ku kualke lo por bira malu durante di e dianan di ekstremo kalor aki. Kambionan temporal ku SDKK a tuma pa mitigá e ola di kalor aki ta:
- Práktika di Deporte & Gym ta sera temporalmente pa garantisá e seguridat di detenidonan pa nan no bira malu durante di hasi ehersisionan.
- Detenidonan por ta for di nan sel den nan blòk “vrij van beweging” durante un orario adaptá.
- Subi kantidat di eis ku ta repartí na e detenidonan.
- Proyektonan ku ta sosodé pafó di SDKK kaminda detenidonan ta traha ta terminá mas tarda 12:30 i ta paden na SDKK 13:00.
Tim di maneho di Kuerpo Polisial Kòrsou i Brantwer Kòrsou a informá Minister alabes ku nan tambe a pone disponibel un kantidat di awa/ijs pa e personal tin sufisiente na tur momentu i ku nan por refreská den e ola di kalor aki. Alabes a informá di algun situashon den kual èrko no ta traha i ta hasi e trámitenan nesesario pa remediá esaki tambe lo mas pronto posibel. Huntu ku tur e demas organisashon hudisial Minister di Hustisia lo sigui vigilá e ola di kalor aki i lo tuma medidanan adekuá na momentu ku esaki ta nesesario.
