SERVISIO DI ATMISHON KU INTERUPSHON DEN SERVISIO NA KLIENTE
MINISTERIO KONSERNÍ HUSTISIA
SERVISIO DI ATMISHON KU INTERUPSHON DEN SERVISIO NA KLIENTE
PUBLIKÁ RIBA 07 YÜNI 2024
Willemstad – Servisio di Atmishon ta informá ku su departamento di servisio na kliente tabata será ayera 6 di yüni i tambe awe 7 di yüni 2024. Esaki debí na un problema ku sistema di èrko den sala di espera di kliente.
Servisio di Atmishon mester a tuma e desishon akí debí ku ta trata di un espasio será sin sirkulashon di airu. No ta responsabel pa a risibí kliente den e kondishonnan akí mirando ku ta hasiendo hopi kalor e dianan aki. Téknikonan ta trahando e dianan akí pa resolvé e problema.
Riba e fechanan ariba menshoná tabatin personanan ku sita pa tuma nan título di residensia. Tur e personanan aki lo risibí un yamada òf e-mail pa pasa riba e siguiente fechanan:
- Personanan ku sita dia 6 di yüni mester pasa djaluna 10 di yüni 2024 na e mesun orario
- Personanan ku sita dia 7 di yüni mester pasa djamars 11 di yüni 2024 na e mesun orario
Servisio di Atmishon ta gradisí su klientenan pa e komprenshon i lo ta habrí bèk djaluna 10 di yüni pa brinda e servisio kustumbrá.

