POSIBILIDAT PA BEKA DI WMO PA ESTUDIO DI METEOROLOGIA NA COSTA RICA
MINISTERIO KONSERNÍ TRÁFIKO, TRANSPORTE I PLANIFIKASHON URBANO
POSIBILIDAT PA BEKA DI WMO PA ESTUDIO DI METEOROLOGIA NA COSTA RICA
PUBLIKÁ RIBA 12 MART 2024
Willemstad – Resientemente, Organisashon Mundial di Meteorologia (WMO) a tene un evaluashon di estudionan meteorológiko na fakultat di físika na e Universidat di Costa Rica (UCR). Kada tantu aña OMM ta hasi bishita na e Servisio Meteorológiko Nashonal i Universidatnan den un pais pa rekonfirmá nan komo Sentro Regional di Entrenamentu (Regional Training Center, RTC).
Generalmente, un Servisio Meteorológiko ta traha ku diferente Universidat i Instituto na nivel nashonal pa forma nan personal den diferente ramo di meteorologia i klimatólogia.
Tumando na kuenta e nesesidat den region, WMO ta enkurashá paisnan pa pone nan fasilidatnan di entrenamentu disponibel pa asina personal di otro paisnan den region tambe por haña entrenamentu. Huntu ku WMO lo pasa dor di un proseso pa apuntá e institutonan nashonal pa bira un sentro di entrenamentu regional (RTC). WMO na su turno por duna fondonan nesesario na e institutonan i beka na studiantenan ku ta bai hasi nan estudio na e sentronan aki. Pa garantisá e kalidat di estudionan aki, WMO ta evaluá kada tantu aña e programanan di e institutonan ku ta forma e RTC.
Den e kuadro aki, resientemente un delegashon na nòmber di WMO tabata di bishita na RTC Costa Rica pa evaluá e institutonan envolví. E delegashon tabata konsistí di Sr. Paul Bugeac, koordinador di edukashon di WMO i Sr. Albert Martis, direktor di Servisio Meteorológiko Kòrsou, den su kapasidat di representante di e Panel di Desaroyo di Kapasidat di konseho ehekutivo di WMO. A hasi bishita na servisio nashonal di meteorologia, Universidat di Costa Rica i e instituto nashonal di elektrisidat komo un kliente klave. E resultado preliminar ta indiká ku e institutonan ta mantené nan mes na e kalidat di e programa di WMO i a krea programa nobo ku ta tene kuenta ku nesesidatnan di diferente paisnan den nos region. Den e próksimo lunanan e proseso di aprobashon lo tuma lugá na e kantor prinsipal na Geneva pa asina por formalisá e rekonfirmashon di e RTC Costa Rica.
Ku e logro aki lo hasi posibel pa empleadonan di e servisio meteorológiko den Sentro Amérika i Karibe, i di Kòrsou tambe por risibí beka for di WMO pa por sigui estudio di meteorologia na universidat di Costa Rica.
Ministee Charles Cooper ta kontentu di mira e paso importante aki, mirando su importansia pa Kòrsou, spesífikamente empleadonan di Meteo.
