Promé Minister Pisas ta honra bario di St. Willibrordus pa su aportashon na konstrukshon di nashon

WILLEMSTAD – Djadumingu, 9 di novèmber 2025, Promé Minister Gilmar Pisas tabata presente na Banda Bou pa selebrashon di Dia di Sint Willibrordus, organisá pa Fundashon Desaroyo Sint Willibrordus. E evento a tuma lugá den un ambiente di union i orguyo lokal, kaminda tambe Selikor a selebrá su 30 aña di eksistensia.

Den su diskurso, Promé Minister a ekspresá su agradisementu di kurason na Fundashon Desaroyo Sint Willibrordus pa e dedikashon kontinuo pa mantené e komunidat bibu, fuerte i uní. E la indiká ku Sint Willibrordus ta mas ku un bario: “E ta un komunidat ku su mes alma, ku amor di su habitantenan pa otro.”

Promé Minister Pisas a enfatisá ku konstrukshon di nashon no ta solamente un tarea di Gobièrnu, sino di kada siudadano ku ta traha huntu pa krea komunidatnan fuerte i resiliente. Den e kuadro di e plan di Nation Building, Promé Minister a indiká ku e trayekto lo kuminsá den barionan ku tin retonan sosial i ekonómiko, ku atenshon spesial pa seguridat, servisio públiko i oportunidat pa hóbennan.

Durante di su diskurso, Promé Minister Pisas a nombra dos notisia importante pa e komunidat di Sint Willibrordus:

• E Kaya ku ta konektá Bullenbaai ku Banda Bou pronto lo wòrdu asfaltá, pa mehorá aksebilidat i mobilidat den e área.
• Gobièrnu di Kòrsou a transferí un montante di Cg.100.000 riba kuenta di Misa di Sint Willibrordus pa kontinuá ku e renobashon di e misa, komo un kontribushon simbóliko pa preservá e herensia religioso di e bario.

E a hasi tambe un apelashon na otro instansianan i persona di bon boluntat pa yuda ku nan aporté finansiero, pa e proyekto di renovashon por sigui ku e dignidat ku e meresé.

Despues di e diskurso 3 baluarte di e bario tambe a wordu homenaheá, Ta trata di sra. Enid Hollander, sr. Boy Kastablank I sr. Anthony Curial. Promé Minister Pisas huntu ku kolega Minister van Heydoorn di ministerio di OWCS a hasi entrega di nan plakat. Baluartenan ku ta traha inkansabel te ku awe pa nan bario St. Willibrordus.

Promé Minister a sera su diskurso ku e sigiuente mensahe:

“Konstrukshon di nashon ta kuminsá akí, na Sint Willibrordus mes, i despues di bario pa bario. Kada biaha ku nos hisa nos manga di kamisa pa traha pa komunidat, nos ta sigui konstruí nos pais. Laga nos hasi esaki ku amor, rèspèt i fe den nos mes, pa Kòrsou bira e pèrla di Karibe.”

Dios bendishoná Kòrsou i tur habitantenan di Sint Willibrordus.