UN DANKI DI KURASON NA SRA. MEINDERT ROSINA-LUCIANO
MINISTERIO KONSERNÍ ENSEÑANSA, SIENSIA, KULTURA & DEPORTE
UN DANKI DI KURASON NA SRA. MEINDERT ROSINA-LUCIANO
PUBLIKÁ RIBA 14 YÜNI 2024
WILLEMSTAD – Minister di Enseñansa, Siensia, Kultura i Deporte (ESKD) sr. Sithree van Heydoorn a yama sra. Meindert Rosina-Luciano danki di kurason pa su 34 aña nan den servisio di Gobièrnu. Awor sra. Meindert Rosina-Luciano ta bai baha ku penshun meresidamente despues di a laborá na vários ministerio i di kual e último 10 añanan komo Financial Controller na ministerio di ESKD. Sekretario general sra. Susan Larmonie-van Heydoorn huntu ku direktornan di ministerio di ESKD sr. Wladimir Kleinmoedig i sra. Lizette Sambo-Velder, den kompania di algun kolega ku a traha mas di aserka, tambe a yama sra. Meindert Rosina-Luciano danki pa su aporte balioso na e ministerio.
Minister di ESKD sr. Sithree van Heydoorn a hasi entrega di un sertifikado di apresio i sekretario general di ESKD sra. Susan Larmonie-van Heydoorn a hasi entrega di un bunita kuadro ku ministerio a pinta huntu den un aktividat di personal (team building) i ku ta sra. Meindert Rosina-Luciano su kuadro preferí. Kolega Surmarie Hortencia a hasi entrega di un regalo na nòmber di tur kolega di ministerio i a yama danki pa instruí i guia hopi kolega den ministerio den e área di finansa.
Sra. Meindert Rosina-Luciano kompañá pa su esposo a keda sumamente kontentu ku e atenshon i a gradisí tur hende pa e atenshon bunita. Tambe el a yama minister di ESKD sr. Sithree van Heydoorn danki pa e konfiansa di por a traha di un forma habrí i di a komuniká kuné direkto kaminda e rèspèt mutuo semper tabata tei.
Minister di ESKD sr. Sithree van Heydoorn ta apresiá i a gradisí sra. Meindert Rosina-Luciano pa su aporte na nos nashon Kòrsou.
—
KOMUNIKASHON
*Riba e potrètnan athunto por tuma nota di e moment ameno i kaminda minister van Heydoorn a hasi entrega di sertifikado di apresio na nòmber di Gobièrnu di Kòrsou na sra. Meindert Rosina-Luciano.
Un danki di kurason na sra. M. Rosina – Luciano
