Deklarashon di Intenshon pa kolaborashon hudisial a keda firma

WILLEMSTAD – Den oranan di mèrdia, Minister di Hustisia mr. Shalten Hato, huntu ku
Minister di Asuntunan General, Gilmar Pisas i tambe Hefe di Kuerpo Polisial, Raymond Ellis,
Komandante interino di Brantwer Kòrsou Anagertrudes Rodriguez, Luitenant Kolonèl di VKC
sr. Roger Gibbes, Derrick James, Komandante di Brigada di Seguridat I Formashon I tambe sr.
Anthony Hasselmeijer, direktor interino di Sentro di Detenshon I Korekshon Kòrsou a firma
un karta di intenshon pa e kolaborashon den e kadena hudisial pa risibí fortifikashon riba
diferente área.
Minister di Hustisia, Shalten Hato a laga traha un “startnotitie” ku ta hiba e nòmber
BOLUNTAT, den kual entre otro den Rijkswet Politie, tin e oportunidat pa traha ku polis
boluntario kual ta yuda pa fortifiká e kuerpo di polis i tambe lo yuda pa minimalisá e falta di
personal ku tin den e kuerpo. Tambe Brantwer Kòrsou den su plan di mas aña a indiká di lo
ke start bèk ku boluntarionan den e kuerpo. Anteriormente Brantwer Kòrsou den pasado ya
tabata hasi uso di boluntarionan den e kuerpo, pero despues esaki a bira ménos atrabes di
tempu.
Den kuadro di e “startnotitie” BOLUNTAT, ta netamente e oportunidat pa plania awor
atrabes di un periodo di 4 luna, kon entre otro VKC I tambe Brigada di Seguridat por nifiká
pa e kuerponan uniformá aki. E intenshon ta, pa fortalesé I formalisá e kolaborashon entre e
diferente organisashon pa benefisio di ehekushon mas efisiente I efektivo di e diferente tarea
I responsabilidatnan den e kuerponan. Ku e karta di intenshon aki, ta e intenshon pa logra
ku e kuerponan por duna otro e sosten pa riba diferente área kolaborá no solamente na
momentu di un kalamidat, pero tambe durante diferente trabounan diario i òf
ekstraordinario.
Na final, a forma un kadena di union simbóliko, komo muestra di e intenshon pa
kolaborashon I yega na desaroyonan nobo, den kual e union di e diferente kuerponan lo
yega na fortifikashon pa un mihó kadena hudisial.