Durante fin di siman Minister Pisas a bishitá playa i haf di piskadó pa tuma nota di situashon i proyektonan den ehekushon
Willemstad – Durante fin di siman ku a pasa Minister di Asuntunan General enkargá ku e sektor di Agrikultura, Medio Ambiente i Naturalesa señor Gilmar Pisas a bishitá haf di piskadó di Caracasbaai pa huntu ku funshonarionan di AVB (ántes LVV) tuma nota di aktividatnan ku ta tuma lugá na e haf. Minister Pisas a hasi tambe un rekorido den Spaanse Water pa tuma nota di aktividatnan ku ta tuma lugá na kosta i riba laman.
Na Caracasbaai Minister Pisas a papia ku diferente piskadó tokante fasilidatnan ku e haf ta ofresé. Pa redusí gastu di awa por ehèmpel ta evaluando e posibilidat pa hasi uso di bestpractices, pues instalashon di meternan inteligente. Minister por a tuma nota tambe di diferente aktividat na e haf pa kual mester buska un alternativa na fabor di piskadónan i AVB. Despues Minister a subi laman huntu ku Havenmeester señor Laroche pa mira algun konstrukshon posiblemente ilegal i e kantidat di embarkashon ku hende ta habitá ku ta stashoná permanentemente den Spaanse Water. Despues Minister Pisas a bai Playa Kenepa pa tuma nota di proyektonan den ehekushon na playanan di Banda Bou.
Na playa Kenepa Grandi ta drechando e palapanan kibrá i lo pone un “drijflijn” pa protehá landadónan kontra boto i seadoo. Tambe lo ploeg e dam parti pariba di e playa pa redusí molèster di stòf i lo atendé e molèster di kachonan i porko. Na Kenepa Chikí ta bai konstruí baño i wc. Promé biaha ku Kenepa Chikí ta haña e fasilidatnan básiko aki pe usuario lokal i turista. Na Daaibooi e dak di e terasa ta den un estado deplorabel ku ta forma peliger i pronto lo drecha esaki i e bañonan. Asina Minister Pisas ta kordiná diferente proyekto ku e meta pa duna nos mes hendenan pero tambe turista mihó servisio i fasilidat na nos playanan i hafnan di piskadó.
