IDEANAN INOVATIVO I INSPIRATIVO NA COLOMBIA PA KUMPLI KU SOÑO DI NOS PUEBLO

Willemstad – Nos komunidat tin un nesesidat grandi pa bibienda propio. Hopi suidadano tin e soño di tin nan mes kas, nan mes hogar. Tin diferente forma pa yega na hasi e soño aki un realidat. Ku esaki den mente, Minister Charles Cooper huntu Fundashon Kas Popular (FKP), tambe den nan afan pa yega na ideanan nobo i inspirativo pa bibienda pa pueblo, ta na Colombia e siman aki.

Durante di e biahe aki, Minister Cooper i FKP tin un agènda intensivo i impreshonante. Nan ta reuní ku Presidente di CAMACOL, ku ta para pa ‘Camara Colombiana de la Construccion’. Tambe tin un enkuentro ku Minister di Bibienda di Colombia, Sr. Catalina Velasco. Esaki ta tuma lugá na Bogotá.

Despues ta sigui pa Baranquilla, kaminda lo bishitá un proyekto di kas pa pueblo grátis. Tambe lo reuní ku gobièrnu lokal tokante asuntunan di bibienda. Lo hasi un rekorido adishonal na e proyekto ‘Mi Casa Ya’.

Ora regresá pa Bogotá, lo bishitá proyektonan di bibienda pa pueblo na Bogotá mes, siguí pa un enkuentro ku ASOBANCARIA, ku ta e asosiashon di Banko i Entidatnan Finansiero di Colombia. Meta di esaki ta pa haña un bista klá di kon por traha huntu ku bankonan lokal pa finansiá proyektonan grandi di bibienda.

Tambe lo tin sita ku kompanianan di konstrukshon grandi pa analisá kon esakinan ta atendé ku proyektonan magno.

Tur esaki, na benefisio di pueblo di Kòrsou.  Lo bin bèk ku idea i plannan konkreto pa ehekutá na Kòrsou, i asina kumpli ku e promesa di e gobièrnu pa yena e nesesidat di pueblo pa bibienda.