Piesa nobo “Tukun” ta un dulsura…

RAFIK ta pone bo kurason bati un poko mas duru

 

WILLEMSTAD: RAFIK, awor bou maneho di KJ74 Entertainment, ta lansa su promé kansion titulá “Tukun”. E kantante tin algun luna trahando riba su produkshonnan ku próksimamente lo tin ku keda lansá. Pa algun aña kaba RAFIK, ta produsiendo su propio kansionnan den género musikal urbano, i a bin ta kosechá éksito prinsipalmente via streams di Spotify/ YouTube. Esaki mes tabata un di e aspektonan importante pa logra e akuerdo ku KJ 74 Entertainment.

 

RAFIK ta un kantante ku a bin ta traha duru i den silensio riba su arte, imágen i presentashon. Kansionnan ku sigur bo konosé ta e.o “Dime” ku a alkansá 876,000 views, tambe “Bora Bora”, “El Momento”, i “El Besito”. RAFIK tin presensia kaba den merkado latino, i ta konta ku un siguimentu konsiderabel riba retnan sosial. Ta kustumbrá di tende e kantante den género musikal reaggeaton i urban, e biaha aki ta presentá un Afrobeat. E aña aki ta unu di hopi kresementu – mundialmente- p’e género Afrobeat. “Tukun” tin un zonido outéntiko i pegahoso, ku tur potensia pa alkansá plataforma internashonal. Aktualmente RAFIK ta den eksterior pendiente mas grabashon; awe ta lansa “Tukun” i ta spera ku Kòrsou su kurason ‘bati’ mes duru p’e piesa ku RAFIK su kurason ta bati p’e damita den e produkshon.

 

“Tukun” ta papia di e ‘palpitashon’ ora bo wak e damita di bo soño. Pa e kansion aki RAFIK ta bolbe traha ku Pagliarini En La Letra, un kolaborashon ku a resultá masha eksitoso den pasado. “Tukun” ta produsí pa Getamilli i por wòrdu skuchá entrante awe na tur radio emisora lokal. Suskribí na kanal di YouTube KJ74 Entertainment i stream riba iTunes/ Spotify/ Tidal/ Apple Music.