Kampaña pa sera konosí ku florin karibense ta start 1 di yüli
PB2024-026
Kampaña pa sera konosí ku florin karibense ta start 1 di yüli
WILLEMSTAD/PHILIPSBURG — Entrante 1 di yüli, Centrale Bank van Curaçao en Sint Maarten
(CBCS) ta start un kampaña na tur dos pais pa lanta kuriosidat pa nos valuta komun nobo, florin
karibense. Dia 31 di mart 2025, florin karibense lo drenta sirkulashon. Na kaminda pa e
momento ei, e kampaña akí ta marka inisio di un trayekto di un luna den kua públiko lo diskubri
mas tokante e moneda nobo. Diferente persona di tantu Kòrsou komo Sint Maarten lo figurá
prominentemente den e kampaña, opservando algu ku masha interes. Pero ta nan so por mira
ta kiko e ta. Nos ainda no. Meta di e kampaña ta di lanta interes den e valuta nashonal nobo,
ku algun kara konosí i un toke di misterio.
E kampaña lo dura te dia 22 di ougùstùs 2024. Riba e dia ei, lo revelá diseño di e biyete- i
monedanan na mes momento, tantu na Kòrsou komo na Sint Maarten. Unabes ku diseño di e
biyete- i monedanan nobo a bira konosí, lo lansa un kampaña di informashon pa sera públiko
konosí ku e valuta nobo, splikando komunidat tokante e karakterístikanan di e biyete- i monedanan
i e historia tras di nan diseño. Tambe, CBCS lo kuminsá prepará personal di banko i di tienda pa
nan sa kon traha ku e valuta nobo.
Despues di un periodo di tres luna den 2025, den kua e dos valutanan lo ta den sirkulashon pareu,
e biyete- i monedanan nobo di florin karibense lo bin remplasá florin di Antia Hulandes sin
problema. Un valuta konfiabel ta, i ta keda, un di e pilánan di un ekonomia modèrno. Introdukshon
di florin karibense ta basá riba e desishon di e gobièrnunan di Kòrsou i Sint Maarten pa establesé
un union monetario ku un valuta komun, florin karibense, despues di restrukturashon di e paisnan
na 2010. Pero for di 2010, e dos paisnan a bin ta usa valuta di un pais (Antia Hulandes) ku no ta
eksistí mas. Fuera di esei, introdukshon di e valuta na 2025 ta nesesario mirando ku, segun
pronóstiko, e stòk eksistente di biyete i moneda di florin di Antia hulandes lo sigui baha te ku, na
un dado momento, e stòk akí lo agotá. E spesifikashonnan antikuá di e biyete- i monedanan aktual
ta oumentá e riesgo di tin plaka falsifiká, di kalidat haltu, den sirkulashon. Pa públiko, komunidat
bankario i komèrsio por sigui konfia nos moneda, florin karibense lo bini ku karakterístika modèrno
di outentisidat ku lo yuda garantisá efisiensia di nos sistema di pago.
Willemstad, 28 di yüni 2024
CENTRALE BANK VAN CURAÇAO EN SINT MAARTEN
