Ministerio di GMN a kuminsá drecha playanan na Banda Bou

Ministerio di GMN a kuminsá drecha playanan na Banda Bou
Willemstad – Minister di Asuntunan General enkargá ku Agrikultura, Medio Ambiente i Naturalesa señor Gilmar Pisas ta informá ku Ministerio di GMN a kuminsá ku trabounan di drecha playanan na Banda Bou ku a sufri daño durante e awaseru fuerte di 4 di mei último. Prosesonan den Ministerio di GMN pa risibí i evaluá ofertanan di kontratistanan pa hasi e trabounan a tuma su tempu. Relashoná ku esaki, Minister Pisas a hasi su máksimo esfuerso pa pone prosesonan kana mas rápido posibel pa e trabounan por tuma lugá.
Djaweps último a kuminsá ku trabounan na playa di Sta. Cruz ku entretantu ya ta terminá. Despues a sigui ku playa di Kenepa Chikí kaminda a drecha e playa i palapanan ku tambe a keda destruí pa e fuerte awaseru i laman brutu. Na momentu ku terminá ku e playanan ya menshoná, ta sigui pa playa Kenepa Grandi ku a sufri daño konsiderabel, playa di Lagun, Jeremí, Wèstpunt i playa Kalki. Apesar ku nos ta den temporada di orkan ku chèns riba mal tempu ku por destruí e playanan atrobe, Ministerio di GMN ta kumpli ku su tarea pa tene nos playanan na òrdu pa komunidat di Kòrsou i turistanan ku ta bishitá nos isla. Ta kalkulá ku trabounan pa drecha tur e playanan lo dura tres siman.





