PABIEN NA TRAHADO NAN DI CRU I NA PUEBLO DI KÒRSOU

 

PABIEN NA TRAHADO NAN DI CRU I NA PUEBLO DI KÒRSOU

 

Willemstad – Despues di 5 aña ku e refineria ta inaktivo, nos kompania estatal Refineria di Kòrsou (RdK) ku ta doño di e instalashonnan petrolero di Kòrsou, ni Gobièrnu di Kòrsou, no por para ketu mas mira e instalashonnan menshoná ta sigui bai atras i hopi kuponan di trabou, tantu di CRU komo via e kontratistanan ta na peliger. Esaki simplemente no ta sano huisio.

Ademas mirando e estado ku esaki ta den aktualmente, no ta prudente pa reaktivá e refineria sin ku a  tene debido kuenta ku e eksigensianan ambiental ku tin pa operá e planta.

 

Mirando e kuadro aki Gobièrnu di Kòrsou ta sumamente kontentu ku, despues di un búskeda di mas di 10 aña sin éksito, RdK por fin a firma un kontrato di ‘lease’ ku e kompania Oryx Midstream di e invershonista di Qatar sr. Ghanim Bin Saad Al Saad pa operashon di e instalashonnan petrolero na Emmastad i Bullenbaai dia 1 di yüli último. Firmamentu di e kontrato aki tabata kulminashon di e negosiashonnan entre Rdk i Oryx, despues ku anteriormente nan a firma un “MOU” na sèptèmber 2023 pa partidonan kuminsá negosiashon riba un “lease” di e instalashonnan petrolero na Emmastad i Bullenbaai.

 

Manera indiká na okashon di e firmamentu di e kontrato di “lease” entre RdK i Oryx, aktualmente e plan di Oryx pa ku e instalashonnan petrolero na Kòrsou no ta enserá e nivel di polushon manera tabata e kaso ku e produkshon di Refineria Isla, pasobra den e promé fase di operashon di e instalashonnan, Oryx ta bai konsentrá partikularmente riba mesklamentu (“blending”) i almasenamentu di produktonan petrolero ku ta refiná kaba, pa yega na gasolin, zeta di motor i diesel di diferente grado i spesifikashon pa diferente uso.

 

E modelo nobo aki di negoshi den sektor petrolero lo duna Kòrsou e posibilidat di mantené tur e kuponan di trabou eksistente na CRU ku aworakí ta kore peliger, usando e infrastruktura eksistente na Emmastad i Bullenbaai sin e polushon di ántes. Mientrastantu ta e plan pa gradualmente Oryx lo modernisá e instalashonnan petrolero basá riba resultado di estudionan tékniko, ekonómiko i ambiental ku lo wòrdu hasi durante e promé tres añanan di operashon.

Di tal manera, ta yega poko poko pero sigur na e forma mas optimal posibel pa operá e instalashonnan petrolero na Emmastad i Bullenbaai, teniendo kuenta ku e rekisitonan stipulá pa nos leinan ambiental i desishonnan di korte den pasado.

Pues despues di e estudionan nesesario lo amplia e operashon di e instalashonnan petrolero di Kòrsou poko poko segun un plan ekilibrá, kreando mas i mas kupo di trabou segun e plantanan ta keda modernisá di un manera akseptabel pa nos medio ambiente i e habitantenan ku ta biba rondó di e plantanan.

 

Ademas e kontrato ku Oryx no ta e úniko desaroyo den nos sektor energétiko.

Gobièrnu di Kòrsou a aprobá tambe pa RdK ehekutá un plan grandi pa desaroyo di e área rònt di Schottegat, i huntu ku Gobièrnu di Hulanda, Gobièrnu di Kòrsou ta bai implementá den futuro serkano un proyekto di “waterstof” komo energia duradero pa entre otro eksportashon na Europa ku lo transformá ekonomia di Kòrsou den algu sin presedente, kreando asina hopi mas kupo di trabou na Kòrsou.

Pues, para ketu no ta un opshon pa Gabinete Pisas II.