VKC ta refutá alegashonnan hasí enkuanto e nombramentu resientemente di un miembro di su tim di Maneho.

VKC ta refutá alegashonnan hasí enkuanto e nombramentu resientemente di un
miembro di su tim di Maneho.
VKC a tuma nota di publikashonnan riba un medio sosial i mensahenan ku ta sirkulá den
kua ta tacha reputashon di mando i miembronan di e kuerpo.
E promé alegashon ta regardá un vakatura ku VKC a yena resientemente pa e funshon
‘Hoofd Divisie Logistieke Ondersteuning’ (HDLO). Esaki ta un funshon den Tim di
Maneho di VKC ku meskos ku e otro funshonnan den kuerpo ta kompletamente
boluntario (sin pago).
Despues di a habri e vakatura aki internamente sin a risibí reakshon, Mando di VKC a
disidí di apliká e prosedura vigente di ‘horizontale instroom’, ku ta hasi posibel ku
hendenan di pafó di VKC por apliká. Konsekuentemente, a habri e vakatura despues
eksternamente tambe di manera ku tantu kandidatonan interno komo eksterno, por a
apliká.
Un komishon di selekshon ku a konsistí di sinku persona, inkluso tres profeshonal
eksterno, a evaluá tur solisitut pa asina garantisá ku e proseso ta kana di forma
transparente. A tene entrevistanan, durante di kua kada miembro di e komishon a haña
oportunidat pa hasi pregunta i duna puntuashon di un manera independiente. For di e
kandidatonan ku a solisitá, e komishon a skohe e kandidato ku segun e puntuashon
total, a ‘fit’ e perfil mas mihó. Pues un proseso kompletamente transparente. Un
‘horizontale instroom’ manera a keda apliká no ta algu in-usual den VKC.
Ta trata na krea e impreshon ku tin algu robes ku e nombramentu di e miembro di Tim
di Maneho. E miembro di Tim di Maneho ku a keda nombrá entrante promé di mei 2024
den rango di Kapitein, á finalisá su ‘basisopleiding’ na 2006 i tabata pa algun aña aktivo
den VKC. VKC a saka un vacatura den korant pa e funshon di HDLO. E kandidato a
solisitá i a sali komo e mihó for di e proseso di solisitut. E funshon (i rango) a keda
otorgá na e kandidato (i e la bai di akuerdo), bou di e palabrashon ku e mester pasa un
‘officiersopleiding’ ahinda. E eksigensia ku un kandidato ku no a pasa un
‘officiersopleiding’, mester kompleta unu tabata konosí adelantá pasó e la a ser publiká
den e vakatura pa e funshon ku a sali den diferente korant. Kiermen aki tampoko no tin
nada robes ku a tuma lugá.
Pa loke ta trata e alegashonan tokante e froude ku a konstatá den kuerpo, VKC ta breve
den esaki. VKC ta lamentá e suseso aki inmensamente. Sinembargo na momentu ku a
konstatá e froude, á denunsiá esaki inmediatamente na Ministerio Públiko ku a investigá
esaki. Korte a tratá e kaso i esaki a resultá den un kondena di prizòn pa e persona ku a
kometé e froude.
VKC a fiha metanan stratégiko bastante ambisioso, manera entre otro: kambio di
struktura i implementashon di diferente proseso i proseduranan nobo pa alsa efisiensia,
drechamentu di su organisashon atministrativo i medidanan di kontròl interno,
digitalisashon, i drecha komunikashon interno/eksterno. E kambionan aki ta nesesario i
ta rekerí un maneho firme i ku e refuerso di e miembro nobo di Tim di Maneho. Mando
di VKC ta konvensí di por logra (huntu ku tur sobrá boluntario) e kambionan nesesario
na bienestar di e organisashon.
Tim di maneho di VKC ta konsiente ku kambio ta trese resistensia, pero alabes ta
konvensí ku kambio ta nesesario pa asina VKC, ku ta kumpli 95 aña e aña aki, por sigui
eksistí i sirbi nos komunidat pa generashonnan ku ta bin. Tim di maneho ta gradisí tur
ku á kontribuí i ta kontribuyendo ku desaroyo positivo di e organisashon i lo sigui traha
firme i ku kurason na lugá na bienestar di e organisashon i pueblo di Kòrsou