KOMUNIKADO DI MINISTER CIJNTJE

Willemstad – Den mi kalidat komo Minister di Desaroyo Ekonómiko di Kòrsou, mi ta dirigí mi na boso ku un sintimentu profundo di responsabilidat i gratitut.

Resientemente, mi a wòrdu akusá di un akto ku mi no a kometé, spesífikamente di a agredí un persona femenino na e evento di Hak’e. Dor di e akusashon grave aki, inisialmente mi a bisa ku lo mi tene un rueda di prensa pa klarifiká mi posishon i duna mas detaye tokante e situashon.

Sinembargo, despues di a risibí konsehonan hurídiko i teniendo kuenta ku e investigashon ainda ta andando, mi a disidí pa no sigui ku e rueda di prensa na e momentu aki. Mi meta prinsipal ta pa kolaborá plenamente ku e investigashon relashoná ku e supuesto denunsia hasí i sigurá ku e bèrdat ta prevalesé.

Mi ke probechá e oportunidat aki pa ekspresá mi mas sinsero gradisimentu na tur esnan ku a brinda mi nan apoyo i konfiansa durante e momentunan difísil aki. Nan palabra di aliento i solidaridat a sirbi komo un gran sosten pa mi i mi famia.

Mi ta lamentá ku algun di un manera òf otro a forma un opinion sin sa tur dos banda di e medaya, pero mi ta konfia ku tempu i hustisia lo klarifiká e echo i lo permití ku e bèrdat sali na kla.

Mi ta reiterá mi kompromiso ku transparensia i honestidat, i lo mi sigui traha duru den mi responsabilidatnan komo Minister di Desaroyo Ekonómiko pa e bienestar di nos pais.

Masha danki pa boso komprenshon i apoyo kontinuo.

Ku tur sinseridat,

Ruisandro Cijntje

Minister di Desaroyo Ekonómiko di Kòrsou