SERVISIO DI ATMISHON TA LANSA CLIENT CONNECTIVITY CENTER

Willemstad – Servisio di Atmishon a lansa djaluna 15 di yüli 2024 su Client Connectivity Center (CCC). E Client Connectivity Center ta un area digital kaminda kliente por konektá digital ku Servisio di Atmishon.

E Client Connectivity Center ta konsistí di tres(3) “self-service kiosk”. Meta di e kiosknan aki ta pa transmití informashon efektivamente na kliente ku ta bin buska informashon personalmente na Servisio di Atmishon, sin tin ku para den rei. E kiosknan ta konektá ku tur informashon ku ta diponibel riba nos website.

Na e kiosknan e kliente por chèk status di su petishon. Si esaki ta aprobá e kliente por traha un sita mesora via di e kiosk. Si e kliente tin mester di informashon general pero no tin akseso na intèrnèt, e por haña tur informashon via di e kiosknan. Si e kliente mester entregá petishon via e-mail òf online pero e no tin un e-mail, por traha esaki tambe via di e kiosknan.  E kliente ku a entregá su petishon online, tambe por subi su “dashboard” via di e kiosknan pa wak status di su petishon. Esakinan ta djis algun servisio ku e Client Connectivity Center ta brinda aktualmente.

Servisio di Atmishon ta enkurashá tur kliente ku bishitá su ofisina pa hasi uzo di e Client Connectivity Center. Hasiendo uzo di e Client Connectivity Center e kliente ta yuda nos sirbié rápido i lihe!