Futuro di investigashon ekonómiko ta pinta briante CBCS ta presentá resultado di Best Economic Research Award 2024
WILLEMSTAD/PHILIPSBURG – Dia 19 di yüli 2024, Centrale Bank van Curaçao en Sint Maarten
(CBCS) a presentá e premio Best Economic Research Award na e ganadónan di e edishon pa
2024. E kompetensia akí a aseptá partisipashon di alumno di Kòrsou i Sint Maarten na nivel di
HAVO i VWO, miéntras ku na nivel di bachelor i master, studiante den eksterior tambe por a
partisipá entregando nan tesina. E aña akí, e ganadónan na nivel di HAVO ta Brandon Matroos
i Giulianno Daal di Albert Schweitzer College, na nivel di VWO, Ian Noor i Jerome Da Costa di
Radulphus College, i na nivel di bachelor, Nathalie Zimmerman Beriguete di University of
Curaçao.
CBCS ta organisá e kompetensia anual akí ku e meta di stimulá investigashon ekonómiko bou di
studiante, spesialmente relashoná ku ekonomia di Kòrsou i di Sint Maarten. Pa hisa e nivel di
partisipashon i e kalidat di e proyektonan, CBCS a organisá seshon di informashon en persona na
vários skol i universidat, tantu na Kòrsou komo na Sint Maarten. Na tur, CBCS a risibí 21 proyekto,
7 na nivel di HAVO i 7 na nivel di VWO, riba temanan manera kambio klimátiko, asuntu monetario
i di divisa, i e impakto di konflikto geopolítiko. E 7 proyektonan na nivel di bachelor a trata, entre
otro, edukashon finansiero digital, moneda digital di banko sentral, turismo i inflashon di preis di
alimento.
Un panel di eksperto ku konosementu amplio riba tereno ekonómiko, fiskal i monetario a evaluá
e obranan presentá. E komité di evaluashon, enkabesá pa Dr. José Jardim, a konsistí ademas di
Drs. Alberto Romero, Drs. Eugene Holiday i Drs. Eric Matto. A evaluá e tésisnan entregá riba
metodologia di investigashon, originalidat i kreatividat, abilidat di skirbi, lay-out i relevansia,
teniendo kuenta ku nivel akadémiko di kada kategoria.
Brandon Matroos i Giulianno Daal (HAVO) a risibí e Best Economic Research Award pa nan
‘profielwerkstuk’ titulá ‘De introductie van de Caribische Gulden (XCG).’ Ian Noor i Jerome Da
Costa a entregá nan werkstuk titulá ‘XCG: A name change, but does it change the game?’, miéntras
ku na nivel di bachelor, a otorgá e premio na Nathalie Zimmerman Beriguete pa su tésis: ‘Digital
financial literacy in Curaçao’.
Durante e seremonia di entrega ku a tuma lugá na CBCS, e ganadónan a presentá nan proyektonan
di investigashon, pa despues risibí nan trofeo. E ganadónan na nivel di HAVO i VWO a risibí un
premio di NAf 2.500, miéntras ku nan skol a risibí un premio kèsh di NAf 5.000. E ganadó na nivel
di bachelor a risibí un premio di NAf 5.000. CBCS ta deseá tur partisipante hopi éksito, tantu den
nan estudio komo den nan karera profeshonal.
Willemstad, 22 di yüli 2024
CENTRALE BANK VAN CURAÇAO EN SINT MAARTEN
