KIKO TA PASANDO

E uniko kaminda ku bo ta haña tur informashon kompletamente gratis. Klik anto lesa. Manda tur loke bo ke pa wordu publika i invitashon pa kubri rueda di prensa na e Email: kikotapasando@outlook.com

GOBIERNU

Gobierno di Aruba: NO TA CONTEMPLANDO PA HISA EDAD DI PENSIOEN

Gobierno di Aruba

 

NO TA CONTEMPLANDO PA HISA EDAD DI PENSIOEN

Segun palabracion cu Hulanda, na aña 2025 lo haci un estudio pa sa con fuerte e fondo di pensioen ta

 

ORANJESTAD – E Compromiso di Gabinete Wever-Croes ta pa garantisa cu e fondo di pensioen di biehes di AOV ta solido. Pa esaki ya desde 2017 Gabinete Wever-Croes a haci tur posibel pa drecha e situacion financiero grave cu nos pais tabata aden, pa asina crea posibilidadnan pa futuro y pa fortifica nos fondo di pensioen.

 

Na aña 2020 ora Aruba a wordo confronta cu e pandemia, Covid 19, y pa por sobrevivi, Aruba mester a presta placa di Hulanda. E placa aki tabata necesario pa yuda henter comunidad, entre otro pa e subsidio di salario pa tur trahado y FASE pa esnan cu a perde trabou y pakete di cuminda pa esnan den necesidad.

 

Manera tur hende por corda, e fiansa aki no a bin sin mas. Hulanda a bin cu exigencianan draconico pa presta Aruba placa durante pandemia. Un di e condicionnan tawata ta cu e edad di pensioen mester subi pa 66 of 67 aña.

 

Gobierno a negocia hopi largo riba e punto aki. Di un banda, Gobierno tabata tin mester di e fiansa pa por yuda nos ciudadanonan sobrevivi. Pero di otro banda Gobierno no kier a acepta e condicion di hisa edad di pensioen sin mas.

 

E ORA GOBIERNO A YEGA NA E SIGUIENTE PALABRACION:

Na aña 2025 lo haci un estudio pa mira (1) si e fondo di pensioen di AOV ta solido. Si e ta solido, no mester tuma ningun paso. (2) Si resulta cu e fondo NO ta solido, Aruba lo tuma e decisionnan necesario pa mantene e fondo solido. Pasobra sino, e fondo ta kibra y no por paga pensioen mas na pensionadonan cu a paga premies pa hopi aña.

 

Tin varios decision cu Gobierno por tuma si en caso e fondo ta exigi esaki. Un di nan por ta aumento di e edad di pensioen. Un otro ta aumento di e premies, entre otro. Hecho ta cu na e momento aki Gobierno no ta contemplando pa hisa e edad di pensioen, y lo haci e investigacion na 2025. Por lo tanto edad di pensioen no ta bay hisa awor manera algun hende ta sugeri. Lo haci investigacion prome y lo evalua tur alternativa prome cu hisa edad di pensioen.

 

Compromiso di Gabinete Wever-Croes ta pa garantisa cu e fondo di pensioen ta solido pa garantisa cu esnan cu awe ta traha y paga premie, tambe por goza di e pensioen aki den futuro.

 

639114718427035"
639114718427035"