Promé Minister Pisas a trese trankilidat bèk despues di e impase entre Aqualectra i Global Oil

 

Willemstad – Dia 8 di yüni 2023 Refineria di Korsou (RdK) a sera un akuerdo di hür ku Global Oil Management Group (Global Oil) kaminda ta otorgá Global Oil e derechonan pa operá, entre otro, e unidatnan GT9 i GT10 pa produkshon di koriente ku ta nesesario pa Global Oil su produkshon di asfalt na Emmastad. Entretantu a kuminsá negosiashonnan entre Global Oil, komo e operadó nobo di e unidatnan menshoná ariba, i Aqualectra pa suministro di èkstra kapasidat na Aqualectra den temporada ku esaki ta nesesario pa satisfasé e demanda di koriente na Kòrsou tur momentu di dia.

Lamentablemente e negosiashonnan aki a kai den un impase evitabel ku posibel konsekuensianan negativo pa usuarionan lokal di koriente si e situashon aki no wòrdu resolvé debidamente y na tempu. RdK i Aqualectra a pone gobièrnu na altura di e situashon i inmediatamente Promé Minister Pisas, komo e minister responsabel pa RdK,  a tuma kontakto ku Global Oil debí na e echo ku e interes general di pais ta eksigí intermediashon i akshon di parti di Gobièrnu pa yega na un posibel solushon i evitá eskalashon ku por tin konsekuensianan negativo pa pais i usuarionan di koriente.

Promé Minister Pisas a indiká na Global Oil ku Gobièrnu a pidi e outoridat ku ta supervisá merkado di energia aki na Kòrsou (RAC: Regulatory Authority Curaçao) pa investigá e situashon ku ta reinando y entrega su informe y rekomendashonnan na Konseho di Minister mas pronto posibel, pa asina  tuma e desishonnan nesesario dentro di un luna di tempu. Konsekuentemente Promé Minister Pisas a pidi Global Oil pa posponé tur akshon ku nan ta konsiderando di tuma te ku promé di sèptèmber próksimo, pa evitá kualke peliger pa e produkshon normal di koriente riba nos isla.

Entretantu Global Oil a bai di akuerdo ku e petishon di Promé Minister Pisas pa warda riba e informe i rekomendashonnan di RAC, dunando Gobièrnu di e manera aki e espasio nesesario pa bini ku un solushon pa e impase riba korto plaso. Di e manera aki Promé Minister Pisas a logra pa Gobièrnu tin sufisiente tempu pa konsiderá opshonnan aseptabel pa tur partido enbolbí i resolvé e impase aktual na  interes di públiko di Kòrsou i e usuarionan di koriente aki na Kòrsou. Entretantu Promé Minister Pisas a instruí RdK komo doño di e unidatnan ku Global Oil ta hür serka dje pa keda vigilá e negosashonnan entre Aqualectra i Global Oil di aserka, pa asina sigurá buena marcha di esakinan. Finalmente, Promé Minister Pisas ta hasi un apelashon fuerte riba tur esnan envolví i pueblo di Kòrsou en general pa keda kalmu i mantené trankilidat durante e periodo ku ta trahando riba e solushonnan nesesario.