Protokòl pa salbaguardiá Seguridat na Skol

WILLEMSTAD – Minister di Enseñansa, Siensia, Kultura i Deporte sr. Sithree van Heydoorn i Minister di Hustisia sr. Shalten Hato den representashon di nan ministerio a firma un protokòl (Samenwerkingsprotocol Veilige Scholen )pa traha huntu i asina salbaguardiá seguridat na skol. E akuerdo aki ta pa e dos ministerionan, huntu ku Ministerio Públiko, Kuerpo Polisial i Bestrijding & Preventie Jeugdscriminaliteit (UOJZ/AJJC) i direktivanan di skolnan traha na e parti di seguridat na skolnan.

E akuerdo a sali for di un trayekto ku tabata tin algun aña kaba i awor bou di e maneho aktual a revisá esaki i firm’é pa traha huntu pa seguridat na skolnan. Huntu ku tur e partnernan ta traha riba prevenshon, un plan di seguridat pa skolnan (schoolveiligheidsplan) kaminda kòntròl den i rònt di skol i kampaña informativo ta bira e puntonan prinsipal pa e situashon relashoná ku seguridat den skolnan.  Kampañanan di prevenshon manera, HALT, Sendé ta keda vigente huntu ku trayektonan ku ta bai stimulá hende traha riba kòntròl propio, i komportashon sosio – emoshonal den balansa manera Disiplina Konsiente i Postive Behaviour Support. E protokòl tin un durashon di 1 aña i ta keda evaluá dos bes pa aña. E promé momentu di evaluashon ta na desèmber 2024.

E dos Ministernan van Heydoorn i Hato ta sumamente kontentu ku e protokòl aki pa motibu ku hunta ta bai traha na un struktura duradero pa salbaguardiá seguridat den i rònt di skol.