Anaïse Piar i Moësha de Paula a sali pa Merka

Anaïse Piar i Moësha de Paula a sali pa Merka

 

WILLEMSTAD – Awe djaweps 15 di ougùstùs, den oranan di tra’i mèrdia, e hóbennan sòftbolista Moësha de Paula i Anaïse Piar a sali rumbo pa Merka riba e buelo AA708 di American Airlines, unda nan lo sigui ku nan estudio i deporte di sòftbòl.

Pero promé ku ámbos hóben a biaha pa Merka, tantu Moësha de Paula i Anaïse Piar, huntu ku nan mayornan, a asistí na nan último entrenamentu ku Pichingolo na Buena Vista Bòlpark i aki ofisialmente a haña nan despedida kompañá ku un regalito di parti di Pichingolo.

Tambe tabata presente mayornan di e hóben Thaima Maximiliana, ku ta na China aktualmente ku e selekshon di reino kompitiendo den e kampionato Mundial U18. Thaima tambe ta pendiente pa sigui ku su estudio i e deporte di sòftbòl na Merka huntu ku Moësha de Paula i Anaïse Piar.

Anaïse (outfilder i 1B), Moësha (kècher) i Thaima ( shòrt stòp)  ta bai studia i hunga sòftbòl na Merka i ta djòin J’Dah Girigorie na Junior College den Indian River State College. E organisashon di Pichingolo ta deseá nos muchanan éksito ku nan estudio i karera deportivo.