Curaçao Jazz Vibes den sentro di siudat 26 i 27 Ougùstùs

Desaroyo Ekonómiko
Curaçao Jazz Vibes den sentro di siudat 26 i 27 Ougùstùs
Publiká riba 15 Ougùstùs 2024
Willemstad – Minister di Dersaroyo Ekonómiko Ruisandro Cijntje, konsiente di e importansha pa eksportá nos talento musikal durante e siman di Curaçao North Sea Jazz Festival (CNSJF) ta ofresé un esenario fenomenal pa eksponé nos talentonan den sentro di siudat. E ekspektativa ta grandi di tantu bishitantenan i nos hendenan lokal pa e festival ku lo tuma lugá di 28-31 di ougustus próksimo. Den e kuadro aki i tumando nota ku e evento di CNSJF lo no ta duna sufisiente oportunidat na talentonan lokal, minister Cijntje ta ofresé na pueblo di Kòrsou dos dia di evento den sentro di siudat. Djaluna 26 ougùstus 2024 Wilhelminaplein lo ta esenario pa e promé dia di Curaçao Jazz Vibes. Isoko, Hershel Rosario i su banda di jazz i Los Compadres lo forma un kombinashon eksepshonal di müzik rítmiko, jazz Karibense i músika Latino pa deleitá nos pueblo i bishitantenan ku müzik di nos mes talentonan. Djamars 27 di ougùstus e esenario ta riba parkeo di Bario Café na Otrobanda. Riba esenario lo tin Junior Tecla i su banda ku muzik bon variá, Gedion Chandler ku su kinteto di jazz i lo sera ku Randal Corsen ku Muzik sin Barera. Ambos evento lo start 7’or di anochi i terminá 11’or i lo ta kompletamente gratis pa pueblo di Kòrsou i bishitantenan di eksterior. Minister Cijntje i su ministerio di Desaroyo Ekonómiko, huntu ku Ofisina di Turismo i CINEX ta esnan prinsipal ku no a spar ningun esfuerso pa henter pueblo di Kòrsou haña amplio oportunidat pa ta partisipé durante e siman di selebrashon di jazz na Kòrsou. Tambe e evento ta konta ku sostén di DMO i Kuerpo Polisial di Kòrsou. Riba petishon di Minister Ruisandro Cijntje, Curacao Restaurant Association a hasi un apelashon na tur nan miembronan pa toka musika di jazz i tambe kontratá nos talentonan lokal pa entretené nan klientela pa asina engrandesé e festival di North Sea Jazz Curacao. Pueblo di Kòrsou i amantenan di musika ta keda kordialmente invitá na e dos dianan di antesala di CNSJF den sentro di siudat.
