Resientemente e institutonan di deporte di Aruba, Boneiru i Kòrsou a reuní na Boneiru tokante e Weganan Interinsular pa aña eskolar 2024-2025. Na e reunion a partisipá IBiSA di Aruba, INDEBON di Boneiru i FDDK di Kòrsou.  E hermana islanan a elaborá tokante e Weganan Interinsular 2024-2025 i tokante e eventonan deportivo ku ya kaba a tuma lugá den lunanan anterior. Nan a papia tambe tokante  e preparashonnan pa e Weganan Interinsular ku ta bai tuma lugá den e añanan binidero. Den aña eskolar 2023-2024 e weganan a tuma lugá promé na Aruba, despues na Boneiru i por último na Kòrsou.

Vários tema a bini dilanti durante e reunion. Nan a evaluá e manera ku e diferente kompetensianan a kana na kada un di e islanan i tabatin un  petishon pa hisa nivel, no solamente di e Weganan Interinsular mes, pero tambe di e parti organisatorio.

Durante e reunion a presentá e diferente ramonan di deporte ku lo bai kompetí den e temporada nobo di deporte interinsular pa aña 2024-2025.

E diferente ramonan di deporte ta:

1.         Ahedres / kategoria 2014-2015 i 2012-2013, mucha hòmber i mucha muhé, skol básiko i skol avansá; Aquathlon / kategoria 2014-2015 i 2012-2013, mucha hòmber i mucha muhé – skol básiko i skol avansá; Futbòl / kategoria 2007 i mas yòn, mucha muhé – skol avansá; E weganan aki pa aña 2025 ta tuma lugá na Kòrsou for di 13 te 16 di mart 2025

2.         Básketbòl 3×3 / kategoria 2011-2013, mucha hòmber – skol básiko; Weg’i Dam / kategoria 2014-2015 i 2012-2013, mucha hòmber i mucha muhé – skol básiko i skol avansá; Vòlibòl / kategoria 2011-2013, mucha hòmber, skol básiko;  E weganan aki pa aña 2025 ta tuma lugá na Aruba for di 27 te 30 di mart 2025

3.         Básketbòl 3×3 mucha hòmber / kategoria 2007 i mas yòn – skol avansá; Atletismo / kategoria 2014-2015 i 2012-2013, mucha hòmber i mucha muhé – skol básiko i skol avansá; Dodgeball (trèfbal) / kategoria 2011-2013 mucha muhé – skol básiko; E weganan aki pa aña 2025 ta tuma lugá na Boneiru for di 10 te 13 di aprel 2025

Meta di e Weganan Interinsular ta pa krea un laso estrecho di amistat entre e hermana islanan riba nivel deportivo. Konhuntamente e institutonan deportivo di kada isla lo pèrkurá pa un organisashon sublime pa aña eskolar 2024-2025.