KIKO TA PASANDO

E uniko kaminda ku bo ta haña tur informashon kompletamente gratis. Klik anto lesa. Manda tur loke bo ke pa wordu publika i invitashon pa kubri rueda di prensa na e Email: kikotapasando@outlook.com

GOBIERNU

Minister di Finansa Javier Silvania ta duna ACU un man.

MINISTER Javier Silvania

Komunikado di prensa
Minister di Finansa Javier Silvania ta duna ACU un man.
Djamars 20 di ougùstùs, Minister di Finansa, Javier Silvania, a hasi un bishita di trabou na ACU (Algemene Spaar- en Kredietcoöperatie) na Kòrsou. Durante e bishita aki, Minister a hiba kòmbersashon ku e direktiva i tim di maneho di e organisashon. Meta di e reunion tabata pa diskutí tokante e tópikonan mas importante ku ta afektá e sektor finansiero, manera e ròl di kooperativanan di spar i krédito den ekonomia, promoshon di inklushon finansiero i atendementu di e retonan ku ACU i institushonnan similar ta enfrentá.
Un tema importante di kòmbersashon tabata e benefisionan fiskal i insentivonan ku lo por ofresé pa sostené empresanan nobo. Esaki a inkluí proposishonnan manera benefisionan di impuesto, supsidionan i otro formanan di sosten finansiero ku lo yuda empresanan yòn krese i desaroyá ainda mas. E diskushon a suprayá e importansia di stimulá e espiritu empresarial i kresementu ekonómiko na Kòrsou, ku un enfoke partikular riba kreashon di kondishonnan favorabel pa empresanan nobo, manera esnan ku ya ta disponibel den algun pais den region.
Ademas, Minister a mustra gran interes den e inisiativa di ACU pa yuda su miembronan optené nan propio kas. Minister a indiká su disposishon pa sinta na mesa ku ACU i otro ministernan envolví pa sigui deliberá i apoyá e inisiativa aki.
Tambe Minister a mustra interes den aplikashon di e prinsipionan di proporshonalidat pa koperativanan di spar i krédito, konsiderando nan karakter i ròl úniko den sosiedat. El a rekonosé e importansia di leinan, regulashonnan i supervishon ku ta hustifiká karakterístikanan spesífiko di e kooperativanan aki, sin komprometé nan ròl sosial den komunidat. Minister a ekspresá su disposishon pa kontribuí aktivamente na kreashon di un diálogo konstruktivo entre e partidonan relevante, ku e meta pa garantisá ku kooperativanan di spar i krédito por sigui kumpli ku nan mishon, kaminda hende ta sentral na un manera sostenibel.
Pronto Minister lo bai den kòmbersashon ku otro kooperativanan di krédito tambe, pa papia tokante nan retonan, ku e meta pa yega huntu na solushonnan ku por fortalesé e sektor en general.
639114718427035"
639114718427035"