5 persona ta resultá heridá durante kandela den bibienda di studiante na Den Haag

Durante un kandela den un bibienda di studiante, studentenflat, den e sentro di Den Haag, tin 5 persona ku a resultá heridá a konsekuensia di huma ku nan a inhalá. E kandela a kuminsá na piso 8 di e edifisio den un di e bibiendanan. E motibu di esaki ta den investigashon. No ta posibel habitá niun di e binti bibiendanan riba e piso aki temporalmente. No ta konosí kuantu persona tabata den e edifisio na momentu ku e kandela a kuminsá. Varios piso a keda evakuá i e area rondó di Rijswijkseplein a keda será. Algu pasá di 14.30 personal di Brandweer a indiká ku e kandela ta dominá.