KIKO TA PASANDO

E uniko kaminda ku bo ta haña tur informashon kompletamente gratis. Klik anto lesa. Manda tur loke bo ke pa wordu publika i invitashon pa kubri rueda di prensa na e Email: kikotapasando@outlook.com

GOBIERNU

SER ta presentá su informe anual 2023

SER ta presentá su informe anual 2023


Resiliensia sosioekonómiko ta keda punto sentral


Willemstad, 10 di sèptèmber 2024
 –Konseho Sosial Ekonómiko (SER) a presentá awe su informe anual 2023 na promé minister sr. Gilmar Pisas i na presidente di Parlamento sra. Charetti America-Francisca. E dokumento ta duna un análisis detayá di e esfuersonan di SER, komo órgano konsultivo, pa konsehá riba desafionan sosioekonómiko di e isla, i tambe pa konsehá riba maneho públiko ku ta stimulá un kresementu inklusivo.

E informe ta resaltá inisiativanan importante ku SER a desplegá durante aña 2023, manera konsehonan riba revishon di diferente lei di impuesto i riba subida di suèldu mínimo, ku por ser konsiderá medidanan esensial pa fortalesé e base sosioekonómiko di Kòrsou. E oumento di salario mínimo tabata ku e fin pa protehá forsa di kompra di trahadó den un tempu di preshon inflashonario. Tambe SER a emití un informe importante riba kreashon di un sistema di garantia di depósitonan, ku tin komo meta pa protehá spardónan kontra eventual krísis finansiero i reforsá e konfiansa públiko den e sektor bankario.

Desaroyo sostenibel a keda komo un di e temanan prinsipal di SER. Ku un akshon simbóliko, a hisa e bandera di e Ophetivonan di Desaroyo Sostenibel (SDG’s) di Nashonnan Uni komo muestra di e kompromiso ku SER tin ku esakinan, respaldá pa aktividatnan konkreto manera promoshon di energia renovabel i redukshon di sushi, impulsando di e forma aki mas konsientisashon riba nos medioambiente den konteksto di kambio klimatológiko. Ademas, SER a organisá diferente evento importante, inkluso e konferensia “Futuro di Trabou na Kòrsou”, kaminda a diskutí ampliamente e impakto di inovashon teknológiko i migrashon riba merkado laboral lokal.

“Na 2023, SER a tuma pasonan signifikante pa sigui fortalesé resiliensia sosioekonómiko di Kòrsou i pa pone un fundeshi fuerte pa un futuro mas sostenibel”, segun drs. Raúl Henríquez, direktor i sekretario general di SER “Nos konsehonan riba oumento di salario mínimo, revishon di leinan di impuesto i introdukshon di un sistema di garantia di depósitonan ta ehèmpelnan konkreto kon nos ta sigui kontribuí na un sosiedat mas ekitativo i resiliente.”

E informe anual 2023 di SER, ku por haña riba wèpsait ofisial di SER, ta duna un bista kompletu di e inisiativanan i rekomendashonnan sosioekonómiko hasí durante e último aña, reafirmando e kompromiso di SER ku futuro di Kòrsou.

Pa mas informashon por bishitá www.ser.cw.

 

639114718427035"
639114718427035"