A honra siudadano ehemplar Pedro Nicolaas “Niki” Tromp ku un plenchi ku ta karga su nòmber

11 sep 2024

Tromp no tabata solamente konosí komo direktor di turismo, sino tambe komo periodista, boluntario i lider den deporte.

Riba djaweps, 5 di sèptèmber 2024, entidat públiko Boneiru a desvelá  nòmber nobo di un plenchi na honor di Sr. Pedro Nicolaas ‘Niki’ Tromp, un siudadano distinguí i kerí den nos komunidat. Oranjeplein, pegá ku Passangrahan, kaminda e promé Ofisina di Turismo tabata situá i na unda Tromp a traha komo direktor, tin un nòmber nobo. Awor e plenchi akí ta karga e nòmber “Plasa Niki Tromp” komo rekonosementu pa su kontribushon inmenso na desaroyo di turismo i komunidat boneriano.

Durante tres dékada, e nòmber Niki Tromp a zona duru riba e islanan aki, konosí no solamente komo direktor di turismo, sino tambe komo periodista, boluntario i lider den deporte. Niki tabata enkargá ku turismo i Regata di Boneiru, i a traha den un forma intensivo pa promové Boneiru komo un destinashon turístiko preferí.

Niki a nase na Aruba dia 5 di desèmber 1937, i despues di su estudio, el a traha na refineria Lago. Despues di a akumulá sufisiente eksperensia, Niki a traha un temporada kòrtiku na Kòrsou i luego a sigui pa Boneiru, na unda el a dirigí e kompania di seguro British American. No a tarda muchu promé ku el a bai traha pa gobièrnu di Boneiru, kaminda despues di algun tempu el a asumí e posishon di direktor di Ofisina di Turismo, situá na e mesun plasa ku awe ta karga su nòmber.

For di e sitio akí Niki Tromp a traha duru pa pone Boneiru riba mapa turístiko mundial. Ku sosten di personanan manera Hugo Gerharts i Don Steward, Niki a pone e base pa turismo di buseo i Regata Internashonal di Boneiru, un evento ku e tabata organisá pa mas ku 30 aña.

Banda di su trabou den turismo, Niki tabata un figura prominente den medionan di komunikashon. E tabata koresponsal pa e korantnan La Prensa i Èxtra i a bira hopi konosí komo reportero di Z86 (Curom) na Boneiru ku su agensia notisiero Multro. Aparte di esaki Niki Tromp a funda Club di Prensa Boneriano i tabata aktivo den diferente otro proyekto sosial i kultural, inkluso maneho di ekiponan di beisbòl i sòftbòl i tambe el a presidí e grupo di aguinaldo ‘Los Pajaritos Navideños’.

Niki a fayesé dia 7 di ougùstùs 1992, un notisia ku a konmové henter komunidat antiano. Niki Tromp su legado lo keda bibu, i e Plasa ku awor ta karga su nòmber lo sirbi komo un rekordatorio di su kontribushon na Boneiru i pa sigui honra su memoria.