TRABOUNAN PA PREMIO EDGAR SUPRIANO TA MOVIENDO DEN BON DIREKSHON
TRABOUNAN PA PREMIO EDGAR SUPRIANO TA MOVIENDO DEN BON DIREKSHON
Willemstad-Manera bo sa, e premio Edgar Supriano, ta e premio ofisial di AMAK, ku ta otorgá na músikonan òf agrupashonnan musikal ku durante di e aña a hasi nan mes meritorio den nan kategoria.
Ta konosí tambe ku dia 22 di novèmber ta dia di e patrono di músikonan kual ta Santa Cicilia i ta e dia spesial kaminda AMAK ta duna un rekonosementu spesial na artistanan i bandanan lokal, residensiá aki na Kòrsou.
Ta trata aki di e premio tan kotisá kual ta e premio Edgar Supriano. AMAK ya tin basta aña ta organisá e aktividat aki i por bisa ku mas i mas ta tuma nota ku e ta engrandesiendo i danki na aporte di nos miembronan músiko, kantantenan i faranduleronan di Kòrsou.
Premio Edgar Surpiano 2024
Direktiva di AMAK den nan reunionnan riba diferente proyekto ku nanta trahando riba dje a tuma nota ku dia di Santa Cicilia e aña aki ta kai riba un djabièrnè. Mirando ku ta un dia ku mayoria músiko i artista tin nan kompromisonan pa ku presentashon, desishon a kai ku ta tene e aktividat aki un dia promé esta djawéps dia 21 di novèmber.
E aña aki e aktividat lo bai ta den e ouditorio di WTC kaminda tur músiko i nan fanátiko lo por tei presente pa presensia e aktividat di gala aki.
Djis pensa kon bunita esaki lo ta pa den un ambiente di gala i na un manera profeshonal bo ta subi ensenario pa risibí bo premio. Pa e motibu aki tambe e kódigo di bisti ta den un estilo formal. Segun dianan ta yegando serka lo bini mas informashon relashoná ku e partinan aki.
E aña aki e galardonnan ta un biaha mas den man di e gran artista yu di Kòrsou Giovannie Abad kende ta esun ku ta diseña e obranan pa e opsekio.
Kon pa skohe e diferente kategorianan
Pa por tin un bista general kon nos komunidat a mira nos artistanan miembro su aktuashon AMAK ta bai pone un lenk disponibel na kuminsamentu di òktober 2024 kaminda por hasi uso di dje pa yena bo eskoho di ken pa bo a destaká den 2024. Tuma nota ku e periodo ku lo husga ta di 1 di novèmber 2023 te i ku 31 di òktober 2024.
E link ta keda bálido te djarason 13 di novèmber 2024.
Pues músikonan i faranduleronan por subi e link entrante 1 di òktober 2024 i aportá na e lista di nominadonan pa e premio Edgar Supriano 2024. Por vota solamente un biaha riba e link.
Loke ku bo mester hasi ta skohe pa kada kategoria, e pèrsona òf agrupashon musikal ku segun bo propio análisis lo mester keda premiá.
Hasi esaki na un manera imparsial i entregá esaki bèk digitalmente pa mas tardá riba dia 13 di Novèmber 2023 23:59 p.m.
Kiko bo mester hasi
Pa por hasi bo ekskoho bo mester hasi lo siguiente. Simplemente kopia e link i òf klek riba dje i e mes ta indiká bo kiko bo mester hasi.
Den transkurso di simannan ku ta bini direktiva di AMAK lo públiká e link kaminda bo por hasi uso di bo derecho di vota pa bo banda i òf artistanan ku segun bo konsenshi a destaká durante e temporada ku nos a indiká mas ariba den e komunikado aki.
Keda pendiente pa hopi kosnan grandi ku lo ta na kaminda ku direktiva di AMAK huntu ku su timnan di sostén ta trahando riba dje.
