Ta ataká problema SVB ku medida robes Komunikado pa prensa di Sr. Rennox Calmes
Hopi kupo trabòu, prevenshon, nos yerba nan, remedi mas barata, inverti e fondo manera (APC)
Ta ataká problema SVB ku medida robes. Trabòu i prevenshon ta solushon.
Ke siguí kòrta den wesu, krea pobresa i pon’é pueblo ku gobièrnu kontra otro.
Edat di penshun pa 66 i 67
Den luna di mei 2024, Sr. Rennox Calmes lider polítiko di Trabou pa Kòrsou a vosifera na pueblo di Kòrsou, ku gobièrnu a bai di akuerdo den “landspakket januari – maart 2024 onderdeel E” pa hisa edat di penshun pero tambe a laga investigá i konkretisa un kantidat di medida den a prima nan social di SVB. E tempu ei minister Silvania i èks minister Larmonie Cicilia a manera kos ku ta informashon robes Sr. Calmes ta tresiendo na klaridat dor di “zwijgen”. Awe 4 luna después Sr. Calmes ta haña rason. For di 4 luna pasa Sr. Calmes a tresé informashon korekto na pueblo, ku e gobièrnu aki a bai di akuerdo den “landspakket onderdeel E” pa hisa edad di penshun na 66 pa otro aña 2025 i, pa 2030 siguí subi’e na 67. Den e reunion di 12 sèptèmber 2024, sr. Calmes ta bolbe haña rason na momentu ku riba pregunta di sr. Calmes, minister Silvania ta kontesta ku a laga hasi 3 investigashon den kuadro di embehesementu i ún djé posibilidat nan ta subi edat di penshun, pero lo mester skohé huntu kua modelo ta bai uza. Djis después minister ta bisa ku e gabinete no ta para pa subi edat di penshun.
Medidanan SVB
Sr. Calmes ta bolbe haña rason ora ku SVB a hasi su presentashon den sala di Parlamento presentando e medidanan:
1. Atrobe ke bai bin ku e proposishon pa baha mas trempan ku penshun a kambio di ún “korting”.
2. Subi O.B ku 1 % pa hink’e den fondo di AOV (penshun di behes).
3. Subi e prima limite di penshun di behes di 100 mil pa 150 mil.
4. Subi e prima di AOV di 15% mand’e 22%.
5. Subi e prima pa hende nan riba e limite di 100 mil florin di 1% pa 8%.
6. Introdusí prima di 6% pa penshonado nan ku ta kobra riba 4000 florin pa luna.
7. Ke subi AOV ku 250 florin pa luna.
8. Subi prima di 10% pa 25 % pa penshonado nan ku ta biba den eksterior.
9. Introdusí seguro pa ora pèrdè trabòu i mas.
Minister a bisa di tin 4 pa 6 míon ekstra debi na “compliance” i pa yanüari 2025 ke duna subida di AOV. Esei ta nifiká ku e 250 florin di subida no ta realistiko. Pero entre 98 pa 147 florin. Tambe mester garantisá e subida aki su kontinuidat. Tambe mester tene kuenta kiko tin para den lèi pa na momentu ku subi sèn di AOV e penshonado no wòrdu perhudika pasó e ta surpasá e limite di 12 mil florin pa aña i konsekuentemente eta hañ’e tin ku paga adishonal fin di aña.
Reformá di gobièrnu ta pa kòrta den kuido di e hende
Gobièrnu ke bini ku sistema nobo pa AOV (penshun di behes), ZV/OV (entrada di labor apesar di malesa of aksidente), cessantia (seguro pa trahadónan ku pèrdè trabòu fuera di nan boluntat)
i bij/onderstaand. Pero e bista di gobièrnu su sistema nobo ta pon’é énfasis unikamente riba sèn i no e hende. Sr. Calmes por ilustrá esaki debi na medidanan ku ya a wòrdu introdusí,
e TMFZ Taakstelling òktober 2019 i medida nan pendiente, medida pa sostené e “schommelfonds” i (OTC) “over-the-counter medicine”. Su meta tábata pa baha gastu den BVZ pa logra spar 70 míon, pero a logra solamente 23 míon ku ta 33%. Su meta tábata pa baha gastu relashoná ku habrimentu di CMC. Pues, e mal desishonnan polítiko tuma den pasado pa ku CMC, ta perhudika kuido di nos hende nan. Baha gastu den BVZ (kuido kurativo)
a nifiká kòrta den kuido di e hende, kòrta den transporte (1%), djente (2%) , wowo (1%), kuido na kas (2%), kuido mental (3%), haña yiu (3%), kuido pafó di país (5%), dòkter di kas (5%), laboratorio (8%), spesialista (11%), botika (18%), kuido interna den hospital (40%) i pa prevenshon ta (1%). Tras di kada kuido mi a buta persentage nan ku e ta kostando komunidat aktualmente. Mester siguí baha den e gastunan aki dor di tumá medida den BVZ ku aktualmente ta konsistí di 51% di e totalidat di gastunan di SVB. AOV/AWW (penshun di behes, viuda i werfano) ta konsistí di 36%). Nan 2 huntu ta 87% di e fondonan di SVB. Después ta sobrá AVBZ (7%), administrashon (3%) i, ZV/OV (3%).
Después ta siguí intenta ku medida pa sostené e “schommelfonds” ku ta pendiente pa implementashon kompletu. Esaki lo mester ekonomisa 45 míon. A sobrá Kòrsou 4 aña promé ku schommel fonds hañ’é den problema. Finalmente gobièrnu su kreatividat inhumano e yega na (OTC) “over-the-counter medicine”. Ta trata di medikamentunan ku bo por haña sin tin mester di rèsèpt di dòkter, manera vitamina, parasetamol etc etc i lo yuda ekonomisa 8 mion.
Prome a kòrta i purba siguí kòrta den BVZ te ku no por mas. Aki a spar 23 míon. Tur e kuido nan ku pueblo tin derechi riba djé, a kòrta den nan. Awor ke tuma mas medida pa skapa schommel fonds i awor ke introdusí OTC. Sr Calmes kier sa ta kua medidanan ta bai tumá pa skapa schommel fonds. Ken esaki ta bai perhudika? A hasi un investigashon ki konsekuensha tin ora introdusí OTC kaminda lo stòp pueblo di tumá vitamina i parasetamol? Ku otro palabra esun ku no tin sèn pa kumprá, por sufri i muri numa.
Mas kupo di trabòu, prevenshon, nos yerba nan, remedi mas barata, inverti e fondo (APC)
1% so nos ta dediká na prevenshon. Asina nos no por baha gastu. Riba pregunta di Sr. Calmes, kuantu di e post di prevenshon ta wòrdu uza pa konsientisá uzo di nos yerba nan? Minister a kontestá ku SVB no tin maneho ahinda delinia pa uzo di nos yerba nan. Si di bèrdat nos ke baha gastu, lo a introdusí e posibilidat aki kaba. Remedi mas barata ta posibel, pero TPK a tumá nota ku esaki no ta na interes di Minister Silvania.
Hasi invershon ekonómiko pa kreá hopi kupo di trabòu, ta skapa e fondo di AOV i BVZ. Ta esei ta e formula pa skapa Kòrsou for di e problema di embehesementu, problema ekonómiko, i kubri gastunan mediko i CMC. Kòrsou su problema ta, tin hopi penshonado (33401), tin hopi pedido pa kuido, pero tin tiki hende ta traha pa inverti den e fondonan. Hasi invershon ku e fondo manera APC ta hasi, tambe ta yuda e fondo di SVB kresé.
Grupo di penshonado perhudika
Tin un grupo di penshonado ku a nasé entre 1 mart 1954 pa 1 mart 1956 ku después ku a introdusí e lèi básiko di kuido general na 1 mart 2013 a bin na remarke pa baha ku penshun promé ku nan hasi 65 aña. Tur ku a hasi uzo di esaki, a risibí 6% menos. Awor ku nan a yega edat di 65, nan tin derechi di risibí nan AOV kompletu bèk. Gobièrnu a duna nan un parti bèk, pero ahinda no kompletu ku konsekuensha ku nan ta sufri di pobresa di 100 piku florin menos ku nan ta risibiendo. Siendo ku esnan ku a baha ku VVU si, gobièrnu a paga tur kos pa nan i nan si ta risibiendo nan AOV kompletu. Aki ta trata di un deskriminashon ku a originá den e afan di gobièrnu nan di turno pa tuma medidanan den purá pa kumpli ku gobièrnu di Hulanda, pero sin investigá nan konsekuensha den futuro.
Kubri orthopedagogo pa nos muchanan
Riba pregunta di Sr. Calmes dikon SVB no ta kubri gastunan di orthopedagogo, Minister Silvania a kontestá: Orthopedagogo no a wòrdu inkluí den e lèi, LB verstrekkingen pakket den e lèi di BVZ ora gobièrnu a introdusí e lèi di seguro básiko na 2013. E ta bai bira diskushon si e ta bai kai bòu di kuido médiko of pedagogia. Na momento ku introdusí e lèi di registrashon di BIG, gobièrnu mester bai figa ún posishon. Pa Trabou pa Kòrsou, Minister Silvania masha dia mester a inkorporá orthopedagogo den e lands besluit (LB) aki, mirando ku LB ta kai bòu di Minister. Ta algu masha fásil. E no ta meskos ku ún sikologo. Orthopedagogo ta spesialista ku ta yuda konstatá delanta problema nan di desaroyonan mental i físiko serka ún mucha. Pero tambe e ta duna guia pa mihó futuro. Tur aña Minister ta saka potrèt ku muchanan ku “downsyndrome” i muchanan outista. Pues, Minister yuda nos muchanan di bèrdat awor.
Gobièrnu ta toká i baila parèu
Gobièrnu a bisa di no ta pará pa ku ideanan pa subi edat di AOV. Tampoko no ta para pa subi prima nan sosial, paso e peso di belasting sosial ta sufisiente haltu kaba riba e siudadano. Pa gobièrnu e solushon mester wòrdu buska den efisiensia di operashon di SVB. Bisando esaki gobièrnu ta konfirmá di no ta buskando mas otro alternativa. Pero e pregunta ta bira, si gobièrnu no ta pro pa subi edat di penshun ni subi e primanan sosial, ta dikon pa di 2 bia gobiernu ta presentá esakinan na Parlamento di Kòrsou? Dikon gobièrnu a siguí dediká i traha riba nan? Dikon gobièrnu ta investigando ketu bai den direkshon di e areglo mutuo? Dikon gobièrnu no a informa gobièrnu Hulandes ku gobièrnu di Kòrsou no ke siguí ku e areglo mutuo? Dikon den e presentashon di dia 12 sèptèmber 2024 den Parlamento, tin skirbí den e investigashonnan, pendiente implementashon o investigashon ta kanando?
Gobièrnu a pasa Parlamento un “fastball”, tuma Parlamento hasi ora Parlamento a para duru kontra COHO, koré bai djayabanda bai formá ún areglo mutuo entre gobièrnu ku gobièrnu, pero ta parse awor ku e kos a traha avarèks. Gobièrnu Hulandes a kue gobièrnu di Kòrsou choka, di manera ku gobièrnu di Kòrsou no por lòs, pasó den areglo mutuo no tin Parlamento pa yuda gobièrnu lòs for di e areglo. Na Spaño nan ta bisa “te salio el tiro por la culata”.
Minister Sanikolas populismo
Ta pesei Minister Silvania a sende su motor di sanikolas populismo kuminsá parti sèn pa trahadónan di CMC ku sèn di pueblo i uza sèn di pueblo pa tur hende bai basha shushi pòrnada na landfill. Pasó e ta bon na altura ku ta medida e mester bai pon’é riba e pueblo. Anto e mihó strategia pa tapá pueblo di Kòrsou su wowonan ta di tira sèn den laira pa blendu e pueblo. Rèper nan na Merka ta bisa bo “make it rain”. Laga awaseru di sèn kai. Asina ta siega tur hende.
