NOS RÈFRINAN LOKAL KU DIFERENTE TORNEO INTERNASHONAL DEN E LUNANAN TRAS DI LOMBA!
NOS RÈFRINAN LOKAL KU DIFERENTE TORNEO INTERNASHONAL DEN E LUNANAN TRAS DI LOMBA!
Apesar ku nos kampionatonan lokal ta pará aktualmente, nos rèfrinan sí ta moviendo den diferente torneo interinsular i internashonal. Norberto Da Silva, nos úniko rèfri di FIFA, ta un di esnan ku den e lunanan tras di lomba a partisipá i dirigí diferente partido di e torneonan aki.
Aki un resúmen di e torneonan ku Norberto a partisipá resientemente i su eksperiensia durante esakinan:
– Club Shield na Kòrsou 23 pa 30 yüli 2024
Esaki tabata un torneo ku a tuma lugá aki ku diferente pais a partisipá na dje. Loke tabata mas ‘great’ di mi partisipashon ta e echo ku e torneo tabata na Kòrsou mes i ku mi por a bolbe topa koleganan di otro paisnan, entre otro Ricky de Leça di Aruba, Leonel Garcia i Yordanis Gomez di Cuba i George Santana di Repúblika Dominikana. Tambe instruktornan físiko i tékniko ku tabata hopi aktívo ku e training i lèsnan ku nos tabata haña komo preparashon pa e torneo aki.
– Central American Cup na Belize 5 pa 10 ougùstùs 2024; partido entre Olimpia di Honduras i Port Layola di Belize.
Aki mi a traha ku koleganan di Nicaragia. Tabata mi promé partido den e torneo aki i un ‘great’ eksperiensia trahando ku rèfrinan di Centro America. Tabata ‘leuk’ pa mira kon e fanátikonan di Olimpia, siendo bishitante ta apoyá nan ekipo ku bandera i pankarta largu, kantamentu i músika konstantemente.
– ABC Cup na Boneiru 16 pa18 ougùstùs 2024
Tabata un eksperiensia hopi agradabel ku koleganan di Boneiru i Aruba. Mi a haña e chèns pa kompartí tur loke mi a siña ku rèfrinan ku ta prospekto pa nan respektivo pais. Tambe mi mes a siña hopi di nan. Un danki di kurashon pa FFB ku a organisá e evento aki i a sòru hopi bon pa e rèfrinan bishitante i tambe esnan lokal. E weganan riba nan mes tabata na nivel haltu i e partisipantenan tabata hopi respetuoso, spesialmente e ekiponan di Boneiru.
Den kada unu di e partidonan aki bo ta siña algu nobo i bo ta sigui krese den bo profeshon.
Pronto lo mi biaha pa Jamaica i Trinidad pa dos wega di Caribbean Cup. Tambe tin un wega di Nation’s League den luna di sèptèmber ku lo mi mester aktua pero ainda e detayenan no ta konosí.
Danki Dios mi ta hañando oportunidat pa representá Kòrsou riba nivel di arbitro, mirando ku nos torneo lokal tin lunanan pará i esei ta afektá hopi di nos komo arbitro. Bo ta mira esei bèk tambe den nos aktuashonnan internashonal ku bo ta for di ‘drive’. Pero tòg ku e apoyo di bo tim di arbitro, konosementu di regla i estado físiko bo ta kai bèk den ‘drive’ basta lihé.
Mi ta spera ku pronto nos kampionato lokal lo reanudá i ku mas oportunidat asina’ki sigui presentá pa nos rèfrinan sigui krese i desaroyá.
24 sèptèmber 2024
