Ruta nobo aki di e kompania Naviero Don Andres di famia De Jongh ta bai ta sumamente importante pa komersio den nos region i en partikular pa Kòrsou, Aruba i Boneiru.

Minister Charles Cooper

Komo minister di desaroyo ekonómiko i minister i tráfiko, transporte i planifikashon urbano, mi ta privilegiá i hopi kontentu di por presensiá e momentu aki i pa mira e proyekto aki materialisá.
E ruta nobo aki di e kompania Naviero Don Andres di famia De Jongh ta bai ta sumamente importante pa komersio den nos region i en partikular pa Kòrsou, Aruba i Boneiru.
Mirando e retonan riba tereno di Supply Chain na hubnan importante na mundu, i ku tin influensha riba komersio internashonal dor di rutanan mas largu, mas karu i ku ta subi kosto di bida, un di e strategianan ta pa stimulá mas komersio intra-regional, esta den nos region.
Ku e ruta nobo aki nos ta dal un stap pa yega na mas komersio den nos mes region di karibe.
Don Andres ta esun ku ta abastesé nos i islanan ruman ku varios produkto i ta fasilita komersio entre nos islanan a,b,c i e ta konektá nos islanan ku Republika Dominikana i awor ku Trinidad.
E impakto ta grandi pa nos empresarionan tantu esnan ku ta importa komo esnan ku ta eksporta. Paso den un tempu hopi kortiku bo merkanisa ta yega su destinashon.
Nos tin algun reto pa solushona den haf pa e logistiká aki na Kòrsou kana optimal i ku esaki nos por konta ku preisnan muchu mas kompetitivo.
E ta influenshá preis di produkto, e ta pone ku nos por konta ku mas akseso direkto na merkado, kual ta stimulá mas negoshi, krese kupo di trabou i fortifiká nos rol komo un player den region.
Nos ta bon kontektá ku Trinidad & Tobago.
Nos tin konekshon aereo direkto ku Caribbean Airlines, ku ta un aerolinea di Trinidad i awor nos ta konektá via marítimo pa medio di un empresa naviera di nos islanan ku ta Don Andres.
Kòrsou komo miembro asosiá di Caricom ta den un posishon faborabel pa yega na akuerdonan komersial mas konkreto. Korsou ku Trinidad & Tobago ta negoshando un akuerdo komersial pa baha opstakulonan pa nos produktonan i servisionnan por subi merkado di Trinidad liber di barera i vise versa.
For di Trinidad nos por trese fruta i berdura, produktonan di konsumo, galiña, manteka, kosmetika, lechi, pa nombra algun.
Pabien na Famia De Jongh ku e logro aki, pa boso forsa i resiliensia.
Pabien empresarionan tantu aki na Kòrsou, Aruba i Boneiru komo na Trinidad ku a sostene e proyekto.
Sigui inverti! Gobiernu tei pa fasilitá boso pa boso ta eksitoso.