Resultado positivo pa HAP den enkuesta entre dòkter di kas ku a registrá
Willemstad, 27 di sèptèmber 2024 – E Sentro di Dòkter di Kas (HAP)ta un
organisashon sentral ku ta duna kuido na hende den momentunan ku e
ofisina di dòkter ta será. Ku un ekipo di profeshonal di kuido ku hopi
eksperensia, HAP ta kla pa yuda hende ku tin nesesidat médiko durante
anochi, wikènt i dianan di fiesta. HAP ta ofresé kuido na miles di hende
riba momentu ku e dòkternan di kas regular ta será. E koperashon ku e
dòkternan di kas ta hunga un ròl esensial den e sistema aki.
HAP ta operashonal pa kasi 9 luna awor i resientemente nan a tuma un
enkuesta telefóniko entre e dòkternan di kas ku a registrá, pa haña un
bista di nan grado di satisfakshon riba e koperashon di kalidat di kuido ku
HAP ta duna. Ku e resultado di e enkuesta, HAP ta traha pa sigui mehorá
nan servisio i pa sigurá kuido optimal pa tur hende na Kòrsou.
79 di e 80 dòkternan di kas (ku ta 99% di nan) a respondé na e
preguntanan di e enkuesta, i e resultado ta mustra ku tin generalmente un
grado haltu di satisfakshon riba e servisio di HAP.
Resultado importante di e enkuesta:
– 95% di e dòkternan ta satisfecho òf hopi satisfecho ku e koperashon ku
HAP.
– 82% ta duna e aksesibilidat pa pashèntnan un 7 òf mas haltu.
– 89% ta satisfecho ku e kuido ku HAP ta duna na nan pashèntnan.
– 92% ta duna e kalidat di kuido un 7 òf mas haltu.
– 54% ta duna e kalidat di e rapòrt un 7 òf mas haltu.
– 89% ta duna HAP un punto general di 7 òf mas haltu
E maneho di HAP ta hopi satisfecho ku e grado haltu di partisipashon di e
dòkternan di kas i ku e resultado di e enkuesta, ku ta mustra ku nan
esfuersonan pa mantene kalidat ta agradabel pa e dòkternan. Mesora, e
maneho ta rekonosé ku tin algun trabou pa hasi den e ária di
dokumentashon di traspaso di pashènt. HAP lo sigui traha pa hasi
mehorámentu aki i ta enfoká riba optimalisá nan proseso di trabou. Ku
evaluashon i adaptashon, HAP lo sigui garantisá i mehorá e kalidat di
kuido.
Resultado positivo pa HAP den enkuesta entre dòkter di kas ku a registrá
E maneho di HAP tambe a monitoriá kon lihe asistèntnan di dòkter ta
kontestá e telefònnan. E sistema di HAP ta registrá hopi dato ita graba tur
kombersashon. A resulta ku 59% di e hende ku ta yama HAP ta sera den 1
minüt. Den 3 minüt, 85% ta sera e konekshon, i finalmente 93% ta sera den
di 5 minüt. HAP normalmente tin 4 te 6 hende ku ta atende e yamadanan.
Den 1 dia por tin kasi 500 yamada.
E maneho di HAP ta pidi pashèntnan pa tene un tiki mas pasenshi na
telefon i no sera lihe. Si bo sera den 3 minüt i bo yama bek, bo ta bula bai
patras den e lista di hende ku ta wardando. Ta importante pa warda un
ratu; na momentu ku asistènt di dòkter ta disponibel, nan lo tuma e
yamada.
HAP lo sigui dediká pa mehorá su servisio i fortifiká e koperashon ku e
dòkternan ku ta registrá.
CHV
E maneho di HAP a tuma nota di e komunikado di prensa di e Asosashon
di Dòkter di kas di Kòrsou (CHV) riba e enkuesta ku HAP a hasi entre e
dòkternan di kas ku a registrá. Den e komunikado di prensa di CHV, ta
indiká ku algun miembro no a risibí e enkuesta i ku e konklushonnan ta
engañoso i no konfiabel.
No tabatin ningun enkuesta skibí, i HAP nunka a indiká ku esaki a pasa. E
enkuesta a tuma lugá telefónikamente, ku ta un manera efektivo pa
kolektá informashon.
HAP ta traha riba base di dato. Tur informashon di e enkuesta ta registrá
den e sistema di HAP. E maneho di HAP a kontrolá den e sistema si tur
dòkter a keda kontaktá telefónikamente. Na tur kaso esaki a pasa.
Diferente dòkter di kas a indiká ku nan ta kontentu ku HAP, pero nan ta
komuniká esaki koutuloso, ta manera CHV no ta permití nan di hasi esaki
libramente. E resultado di e enkuesta telefóniko ta mustra ku
definitivamente tin sintimentu positivo, pero hende no ke e resultado bira
públiko. E situashon aki ta resultá ku dòkter di kas ku ta miembro di CHV
no ke kos positivo den públiko tokante di HAP, i despues ta ninga pa
partisipá den e enkuesta.
Ta notabel ku CHV ta trahando duru pa deskreditá HAP. CHV a intentá pa
mas ku 20 aña pa habri un sentro di dòkter di kas sin éksito. E grupo
Megadienstgroep (MDG) ku e miembronan di CHV a habri, no tabata ku
eksitó. CHV mes a pidi Ministerio di Salud, Medioambiente i Naturalesa pa
krea un Sentro di Dòkter di kas pa Kòrsou.
Ministerio di Salud, Medioambiente i Naturalesa a traha duru pa habri
HAP den un par di luna. E situashon aki ta difísil pa CHV. Tambe ta
doloroso pa CHV ku nan no tin ningun kòntròl riba HAP.
Nan esfuerso pa deskredità e maneho di HAP ta parse manera un intento
desesperá pa haña kòntròl riba HAP.
HAP ta konsiente ku un grupo chikí di miembro di CHV ta aktivo
(posiblemente via politika) pa pone HAP den lus negativo i ku no ta basa
riba bèrdat. E kasonan aki ta bou di investigashon pa Inspektoria di Salud
Públiko. Ora ku e investigashon nan ta kla, lo tin mas klaridat si HAP a
tuma mal desishon den kuido di pashèntnan. Futuro lo demostrá esaki.
HAP ta wak ku konfiansa pa futuro.
Na final, e ta importante pa indiká ku no ta tur dòkternan di kas ku a
registrá ku HAP ta miembro di CHV. HAP ta traha akuerdo ku dòkternan
di kas individual, no ku CHV. HAP no tin ningun relashon ku CHV i no tin
planes pa hasi esaki den futuro. Mientras CHV sigui apoyá e
komportashon negativo di un grupo chikí di nan miembronan, HAP no tin
ningun interes pa forma un koperashon ku nan. Pero HAP ta habrí pa
dialogo konstruktivo ku dòkter di kas individual, sin importá si nan ta
miembro di CHV óf nò