INFORME AKTUALISÁ DI KOMISHON DI NORMALISASHON PA FEDERASHON FUTBÒL KÒRSOU!
INFORME AKTUALISÁ DI KOMISHON DI NORMALISASHON PA FEDERASHON FUTBÒL KÒRSOU!
Manera ta konosí e komishon di normalisashon di FFK (“Komishon”) a start ku su trabou na sede di FFK entrante 6 di sèptèmber último. A plania un reunion informativo ku ekiponan i un rueda di prensa pa introdusí e miembronan di e Komishon i presentá un plan di akshon. A base di informashon adishonal ku e komishon a haña durante di e último dianan, a disidí pa posponé e reunion i rueda di prensa te próksimo aviso.
Sinembargo den kuadro di transparensia e Komishon lo kier duna informashon tokante di resultado di su trabounan durante di e último 3 simannan.
Situashon finansiero di FFK
E Komishon a konstatá ku e situashon finansiero di FFK ta prekario; tin algun reto grandi ku lo mester resolvé riba termino kòrtiku pa por garantisá kontinuashon sano di e organisashon. Esaki a ser diskutí ampliamente ku FIFA/Concacaf pa por yega na resultadonan konkreto. Tambe a kuminsá drenta kontakto direkto ku kreditornan pa plania kon ta yega na palabrashonnan ku lo por kumpli kuné, sin ku ta buta e operashon i eksistensia di FFK na peliger. E Komishon tin konfiansa ku lo por solushoná e problemanan den un termino korto.
Kompetensia lokal
E situashon finansiero ta determinante pa por plania i organisá kampionato lokal na un manera responsabel i duradero. E Komishon ta den deliberashon estrecho ku FIFA/Concacaf pa determiná di ki forma i riba kua termino ta bai kuminsá e kampionanto lokal. Lo bai inisiá un siklo di reunion informativo ku ekiponan riba termino kòrtiku.
Selekshon Nashonal
Den kuadro di e proyekto di Selekshon Nashonal tabatin konsulta ku e staf tékniko i tambe algun di e spònsernan prinsipal pa por kaba di klousurá e siklo di weganan pa aña 2024 i plania e siguiente siklo rumbo pa Mundial 2026. A plania algun reunion den kurso di òktober i novèmber pa por sigui plania pa futuro.
Sekretario General
Un di e puntonan ku tin prioridat di FIFA ta nombramentu di un Sekretario General pa FFK.
E Sekretario General ta e direktor di operashon diario di e organisashon. Despues di evaluá e profil ideal pa e posishon, e Komishon a yega na un akuerdo ku señor Darick Jonis pa fungi komo Sekretario General di FFK entrante promé di òktober pa un periodo igual nan esun di e Komishon.
Sr. Jonis lo ta un adishon hopi balioso pa FFK, tumando na kuenta ku tin un trayekto di kambio ku lo mester kuminsá den e organisashon i tambe pa yuda sanea e situashon finansiero di FFK.
Trankilidat i Konfiansa
Meta prinsipal di e Komishon ta pa krea un ambiente di trankilidat i konfiansa den e mundu di futbòl; esaki lo por ser lográ únikamente si tur partido envolví duna nan koperashon.
30 sèptèmber 2024