KOMUNIKADO: Relashoná ku situashon di griep di para na Merka i riesgo ku paranan migratorio ta trese kuné

 

Brote di Influenza Aviar (IA) na Merka

Willemstad – Aktualmente na Merka tin un situashon di atenshon pa loke ta trata Influenza Aviar (IA) H5N1. IA, tambe konosí komo grip di para òf pèst di para, ku por kontagiá galiñanan doméstiko, patu, gans èts, pero tambe otro tipo di para manera lora salbahe ku tambe por keda infektá. Aki na Kòrsou nos ta hasi tèst regular riba e malesa i ta monitoriá esaki for di aña 2022.

E síntomanan serka galiña por varia for di pèrdè rosea, hinchamentu di kabes, redukshon di pone webu, redukshon di komementu i bebementu te na un mortalidat di 100%. E malesa aki ta kousa impakto ekonómiko enorme den paísnan afektá. E malesa por yega na nos isla via di kontakto direkto òf indirekto ku para migratorio salbahe for di Merka, Sentro Amérika i Golfo di Meksiko. Di e mesun forma aki e ta un riesgo real pa paranan di Kòrsou tambe.

Septèmber te ku novèmber ta e temporada ku paranan migratorio di Estados Unidos ta pasa òf baha riba nos isla. Komo ku na Merka aktualmente tin e problema ku e malesa di griep di para, e paranan migratorio aki for di Merka por forma un riesgo pa kontagiá paranan na Kòrsou. Pa e motibu aki tambe por lo pronto no por laga por ehèmpel postduif bula di otro islanan pa Kòrsou.

Mirando e posibel riesgo di kontagio pa hende nos ta konsehá públiko pa no mishi ku para salbahe ku ta malu òf morto, pero yama Stichting Dier en Onderwijs Cariben via  +5999 515 1776 òf stichtingfdoc@gmail.com na momentu ku topa ku para malu òf morto. Pa mas informashon por tuma kontakto ku nos na info.uovz@gobiernu.cw.

###