Yamada pa personanan responsabel pa dumpmentu di shushi mèldu nan mes i na pueblo en general pa informashon tokante dùmpmentu ilegal na Dam Pretu
Yamada pa personanan responsabel pa dumpmentu di shushi mèldu nan mes i na pueblo en general pa informashon tokante dùmpmentu ilegal na Dam Pretu
Willemstad – Ayera mainta, Ministerio di Salubridat, Medio Ambiente i Naturalesa (GMN) a keda informá mediante un video link: https://we.tl/t-RsgwJHTctf ku a bira viral, di un kantidat di shushi ilegal ku a keda deskrubí pa un siudadano den bisendario di Dam Pretu.
Riba e video por mira nòmber di un habitante di Seru Grandi di fam Cunnage riba algun resibu di banko. Aparte di e fam Cunnage a haña evidensia di un persona mas di e fam Carolina bou di e mesun adres na Seru Grandi
Ministerio di GMN ta hasi un yamada serio na e persona ariba menshoná, ku posiblemente ta doño di e shushinan aki, pa tuma kontakto mas pronto posibel ku GMN pa asina e splika su mes pa ku e shushi en kuestion.
Ta importante pa e persona ku a dùmp e shushi di forma ilegal asumí su responsabilidat i koregí e situashon di ilegalidat ku a keda konstatá!
Ministerio di GMN tambe ta hasi un yamada na pueblo en general pa kompartí kualke informashon ku por yuda establesé kontakto ku e persona òf personanan responsabel (inkluso e posibel transportadó di shushi) den e kaso akí.
E echo akí, aparte di ta kastigabel pa lei, ta unu inaseptabel i totalmente kondenabel, sigur teniendo kuenta ku e esfuersonan ku GMN a bin ta hasi pa un i tur por deshasí di nan shushi di forma gratis i den nan mes área pa medio di e proyekto Di bo, Pa bo, Ku bo.
Ministerio di GMN ta keda hasi su parti pa frena e mal kustumber di dùmpmentu di shushi illegal. Sinembargo, ta solamente ku yudansa di kada siudadano nos por efektivamente mantené nos medio ambiente limpi i salú pa nos i nos futuro generashonnan.
Informashon di kontakto:
Ministerio di Salubridat Medio Ambiente i Naturalesa
Roodeweg 49 (Colon)
Tel: 0800- 0877 (grátis), 525- 2587 i 466- 9366.
E-mail: xteamcuracao@gmail.com
