Djabièrnè atardi tabata tin un insidente di tiroteo na Den Haag

Djabièrnè atardi tabata tin un insidente di tiroteo na Den Haag, Meierijlaan, den kual un hende muhé a resultá grave heridá i e hende hòmber ku a tira a pèrdè su bida. E hende muhé a keda transportá ku ambulans pa hospital. E hende hòmber ku a kita su bida ta Tico Roozendaal konosí na Zoetermeer komo e drechadó di sapatu ku tabata pèrkurá pa tene hóbennan for di riba kaya i yuda nan ku trabou. Anualmente e tabata bishitá kasnan di kuido pa drecha sapatunan di personanan mayor di edat. Hopi siudadano tabata elogiá Tico pa e trabou balioso ku el a hasi pa e siudat i pa e hóbennan.
Despues di e yamada tokante e insidente varios unidat a presentá masalmente. Apesar di agentenan polisial i ambulans tabata tin un tim di sambuyadó tambe presente komo ku un di e personanan envolví a resultá den awa. For di e awa tambe a saka un revòlver probablemente prosedente di e akontesimentu ku a tuma lugá.
Outoridat kompetente ta kontinuá ku e investigashon pa por konkluí kiko ta lokual realmente a tuma lugá na e sitio.




