SSA: DESPUES CU A KITA EX DIRECTOR VROLIJK PER DIRECT, HERVE RUIZ A KEDA NOMBRA DIRECTOR TEMPORAL

SSA:

DESPUES CU A KITA EX DIRECTOR VROLIJK PER DIRECT, HERVE RUIZ A KEDA NOMBRA DIRECTOR TEMPORAL

 

Oranjestad, 22 di october – Stichting Sportsubsidie Aruba (SSA) ta informa cu segun e statutonan di e fundacion, ora no tin director di e fundacion, un miembro di hunta di supervision ta tuma e encargo di director pa un tempo limita, mientras ta busca un otro director. E miembro ey ta pone su posicion den e hunta abou.

 

E director anterior Vrolijk a wordo retira inmediatamente despues cu a sali na cla cu tabata tin iregularidadnan den e fundacion. Debi cu e posicion a keda vacante e momento ey, y segun Statuten di e fundacion, Herve Ruiz a pone su posicion como miembro di hunta abou, pa temporalmente ocupa e posicion di director di e fundacion, mientras e fundacion a cuminsa busca un director nobo.

 

Durante su encargo temporal Sr. Ruiz lo enfoca riba ehecuta tur e recomendacionnan cu a sali di e investigacion, y asina percura cu tin checks and balances den tur sentido, pa evita cualkier iregularidad den futuro.